എംഎൽസി തെരഞ്ഞെടുപ്പ്: തോറ്റ് തൊപ്പിയിട്ട് കോൺഗ്രസ്, നാല് സംസ്ഥാനങ്ങളിലും സമ്പൂർണ പരാജയം
ന്യൂഡൽഹി: നാല് സംസ്ഥാനങ്ങളിലായി നടന്ന 28 ലെജിസ്ലേറ്റീവ് കൗൺസിൽ (എംഎൽസി) സീറ്റുകളിലേക്കുള്ള തെരഞ്ഞെടുപ്പിൽ കോൺഗ്രസിന് തിരിച്ചടി. കർണാടക, ഉത്തർപ്രദേശ്, ബിഹാർ, മഹാരാഷ്ട്ര എന്നീ സംസ്ഥാനങ്ങളിൽ മത്സരിച്ച ഒരു സീറ്റിൽ പോലും വിജയിക്കാൻ പാർട്ടിക്കായില്ല.പ്രത്യേകിച്ച്, കോൺഗ്രസ് ഭരണത്തിലുള്ള കർണാടകയിലെ നാല് സീറ്റുകളിലും തിരിച്ചടിയേറ്റത് പാർട്ടിക്ക് ആഘാതമായി. ബിജെപി – ജെഡി(എസ്) എൻഡിഎ സഖ്യം ഇവിടെ പൂർണ വിജയം നേടി.
*കർണാടകയിൽ ഭരണത്തിലിരുന്നിട്ടും പരാജയം
മുഖ്യമന്ത്രി ഡി.കെ. ശിവകുമാറിന്‍റെ നേതൃത്വത്തിലുള്ള കോൺഗ്രസ് സർക്കാരിന് സ്വന്തം തട്ടകത്തിൽ ഏറ്റ ഈ പരാജയം കനത്ത ആഘാതമാണ് സൃഷ്ടിച്ചിരിക്കുന്നത്. ബിജെപി മൂന്ന് സീറ്റുകളിലും ജെഡി(എസ്) ഒരു സീറ്റിലും വിജയിച്ചു. അധ്യാപകരും ബിരുദധാരികളും ഉൾപ്പെടുന്ന വിദ്യാസമ്പന്നരായ വോട്ടർമാർക്കിടയിൽ ജനസ്വാധീനം ഉറപ്പിക്കാൻ കോൺഗ്രസിന് സാധിച്ചില്ലെന്ന വിമർശനമാണ് ബിജെപി ഉന്നയിക്കുന്നത്.
മറ്റ് സംസ്ഥാനങ്ങളിലെ പ്രകടനവും ദയനീയം
ഉത്തർപ്രദേശ് (11 സീറ്റുകൾ): ബിജെപിയും സമാജ്‌വാദി പാർട്ടിയും (എസ്പി) തമ്മിലായിരുന്നു പ്രധാന മത്സരം. പ്രധാനമന്ത്രി നരേന്ദ്ര മോദിയുടെ മണ്ഡലമായ വാരണാസിയിലെ ടീച്ചേഴ്സ് സീറ്റ് സമാജ്‌വാദി പാർട്ടി നിലനിർത്തിയപ്പോൾ ലഖ്നൗ, മീററ്റ്, ബറേലി എന്നിവിടങ്ങളിൽ ബിജെപി വിജയം നേടി. കോൺഗ്രസ് ചിത്രത്തിലേ വന്നില്ല.
ബിഹാർ (8 സീറ്റുകൾ): പാറ്റ്ന ടീച്ചേഴ്സ് സീറ്റ് ആർജെഡിയും തിർഹുത് സീറ്റ് ബിജെപിയും നേടി. പ്രശാന്ത് കിഷോറിന്‍റെ ‘ജൻ സുരാജ് പാർട്ടി’ ദർഭംഗയിൽ നിലവിലെ കോൺഗ്രസ് എംഎൽസി മദൻ മോഹൻ ഝായെ പരാജയപ്പെടുത്തി കൗൺസിലിൽ ആദ്യ അക്കൗണ്ട് തുറന്നു.
മഹാരാഷ്ട്ര (5 സീറ്റുകൾ): ഭരണകക്ഷിയായ മഹായുതി സഖ്യവും പ്രതിപക്ഷമായ മഹാ വികാസ് അഘാഡിയും തമ്മിലായിരുന്നു പോരാട്ടം.
നിയമസഭാ തെരഞ്ഞെടുപ്പുകൾ പോലെയല്ലെങ്കിലും വിദ്യാസമ്പന്നരുടെയും ജീവനക്കാരുടെയും വോട്ടുകൾ നിർണായകമായ ഈ തെരഞ്ഞെടുപ്പിൽ ഒരു സീറ്റ് പോലും നേടാനാകാത്തത് 2028-ലെ കർണാടക നിയമസഭാ തെരഞ്ഞെടുപ്പിന് മുൻപ് ബിജെപി-ജെഡിഎസ് സഖ്യത്തിന് വലിയ ആവേശം പകരുന്നതാണ്.
