കണ്ണൂര്: കെ എം ഷാജിക്ക് റേഞ്ച് റോവര് നല്കിയ വ്യവ്യസായി യാക്കൂബിനായി സര്ക്കാര് വഴിവിട്ട സേവനം നടത്തിയോ എന്ന റിപ്പോര്ട്ടുകൾ ഗൗരവമുള്ളതെന്ന് സിപിഐഎം നേതാവ് പി ജയരാജന്. കെ എം ഷാജിക്ക് വ്യവസായി യാക്കൂബ് റേഞ്ച് റോവര് വെറുതെ കൊടുത്തതാണോ എന്ന് അദ്ദേഹം ചോദിച്ചു. കെ എം ഷാജി അഴീക്കോട് എംഎല്എയായിരുന്നപ്പോള് സ്കൂള് നിയമനവുമായി ബന്ധപ്പെട്ടാണ് ആക്ഷേപം നേരിട്ടത്. കാവുംപടി എച്ച്എസ്എസ് മാനേജ്മെന്റ് തര്ക്കത്തിലും അത്തരം ഇടപെടല് നടന്നെന്ന് അദ്ദേഹം പറഞ്ഞു. മാനേജ്മെന്റ് ഭരിക്കുന്നത് ലീഗാണ്, മറുവശത്തും ലീഗുകാര് തന്നെ. അതില് ഒരു ഭാഗത്ത് നില്ക്കുന്ന ആളാണ് യാക്കൂബെന്നും ഇവര് നല്കിയ അപേക്ഷയില് വിദ്യാഭ്യാസമന്ത്രി നേരിട്ട് ഇടപെട്ടെന്നും ജയരാജന് ചൂണ്ടിക്കാട്ടി. ഇവരെ കൂടി കേട്ട് തീരുമാനമെടുക്കണം എന്ന് മന്ത്രി എഴുതി നല്കിയെന്നും അഴിമതിക്ക് വളം വെച്ച് നല്കുകയാണ് യുഡിഎഫ് എന്നും അദ്ദേഹം ആരോപിച്ചു.
മന്ത്രിമാരുടെ വിദേശ യാത്രയില് പ്രതികരിച്ച സിപിഐഎം കേന്ദ്ര കമ്മിറ്റി അംഗം കെ കെ ശൈലജ മന്ത്രിമാര്ക്ക് വിദേശ യാത്ര നടത്താം എന്നാല് സര്ക്കാര് ചെലവിലാണോ എന്നതാണ് നോക്കേണ്ടതെന്ന് ചൂണ്ടിക്കാട്ടി. നിയമപരമായി പ്രശ്നമുണ്ടോ എന്ന് ചോദിച്ചാല് ഉണ്ടാവില്ല. എന്നാല് ധാര്മികത നോക്കണമെന്നും ശൈലജ പറഞ്ഞു. സിഎംആര്എല് എക്സാലോജിക്ക് സാമ്പത്തിക ഇടപാട് കെസിലെ ഇഡി കത്തില് അന്വേഷണം ആരംഭിച്ചതിലും അവര് പ്രതികരിച്ചു. ഇഡിക്ക് വിശ്വാസ്യതയില്ലെന്നായിരുന്നു ശൈലജയുടെ പ്രതികരണം. കോണ്ഗ്രസിനെതിരെ അന്വേഷണം വരുമ്പോള് ഇ ഡി ശരിയല്ല എന്ന് പറയുന്നു. എന്നാല് ഇവിടെ സിപിഐഎമ്മിനെതിരെ വരുമ്പോള് ഇ ഡി ശരിയാകുന്നു. ഇത് ഇരട്ടത്താപ്പാണെന്നും സിപിഐഎം നേതാവ് വ്യക്തമാക്കി.
കേരളത്തില് സിപിഐഎമ്മിനെ തകര്ക്കാനാണ് ശ്രമമെന്നും പാര്ട്ടിയുടെ കരുത്തും ശക്തിയുമാണ് പിണറായി എന്നുമായിരുന്നു ഇഡി കത്തിലെ അന്വേഷണത്തിൽ സിപിഐഎം നേതാവ് ഇ പി ജയരാജന്റെ പ്രതികരണം. അദ്ദേഹത്തെ എത്ര കാലമായി ലക്ഷ്യം വെക്കുന്നു. പിണറായിയെ ലക്ഷ്യമിട്ട് വെച്ച വെടി എനിക്ക് കൊണ്ടതുകൊണ്ടാണ് അദ്ദേഹം രക്ഷപ്പെട്ടത്. അത് കൊണ്ടൊന്നും തകര്ക്കാന് പറ്റാതെ വന്നപ്പോള് കുടുംബത്തെ തകര്ക്കാന് ശ്രമിക്കുന്നു എന്നും ജയരാജന് പറഞ്ഞു. കേസ് നിര്മിച്ച് പിണറായിയെ തകര്ത്ത് പാര്ട്ടിയെ ഇല്ലാതാക്കാം എന്നാണ് കരുതുന്നത്. പൊരുതി വന്ന പാര്ട്ടിയാണ് ഇത്. എന്ത് പ്രചരിപ്പിച്ചും പാര്ട്ടിയെ തകര്ക്കാം എന്നാണ് കരുതുന്നത്. ഇതില് പാര്ട്ടി കയ്യും കെട്ടി നോക്കി നില്ക്കില്ലെന്നും ഏതെങ്കിലും കടലാസ്സില് എഴുതി കൊടുത്ത് വന്ന നേതാവല്ല പിണറായി എന്നും ജയരാജന് ഓര്മപ്പെടുത്തി.
യുഡിഎഫ് അവസരവാദികളാണെന്നും ഇത് ബിജെപി യുഡിഎഫ് ഡീല് ആണെന്നുമായിരുന്നു സിപിഐഎം കേന്ദ്രകമ്മിറ്റി അംഗം തോമസ് ഐസക് പിണറായിക്കെതിരായ നീക്കത്തില് പ്രതികരിച്ചത്. ഇഡിയുടെ ആവശ്യം അംഗീകരിക്കണോ വേണ്ടയോ എന്നത് സര്ക്കാരിന്റെ വിവേചനാധികാരമാണ്. കേസില് ഈഡി വേട്ടയാടലും അതിന് യുഡിഎഫ് നല്കുന്ന പിന്തുണയും ദേശീയതലത്തിന് ചര്ച്ചയാകുമെന്നും ഇന്ത്യ മുന്നണി തകര്ക്കുന്നത് കോണ്ഗ്രസ് അവസരവാദമാണെന്നും അദ്ദേഹം ആരോപിച്ചു. സര്വകലാശാലകള് ഗവര്ണര്മാര്ക്ക് വിട്ടു കൊടുക്കുന്നു എന്ന് പറഞ്ഞ ഐസക്ക് പിഎംശ്രീയിലും വന്ദേമാതരത്തിലും ഇതേ നിലപാടാണ് സര്ക്കാരിനെന്നും കുറ്റപ്പെടുത്തി.
