ഇതാണോ സർക്കാരിന്‍റെ പൊലിസ് നയം; വിദ്യാർഥികളെ മർദിക്കാൻ ഉത്തരവിട്ടത് ആരാണെന്ന് ബിനോയ് വിശ്വം
തിരുവനന്തപുരം: കോൺഗ്രസ്-ബിജെപി ബന്ധത്തിന്‍റെ നാണംകെട്ട അധ്യായങ്ങൾ മറച്ചുവയ്ക്കാനാണ് വിദ്യാർഥികൾക്ക് നേരേ ആക്രമണം നടത്തിയതെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. ഇതാണോ സർക്കാരിന്‍റെ പൊലിസ് നയമെന്ന് മുഖ്യമന്ത്രി വ്യക്തമാക്കണമെന്നും അദ്ദേഹം പറഞ്ഞു.
യൂത്ത് കോൺഗ്രസ്-എസ്എഫ്ഐ സംഘർഷത്തിന് പിന്നാലെ യൂണിവേഴ്സിറ്റി ഹോസ്റ്റൽ സന്ദർശിച്ച ശേഷം മാധ്യമങ്ങളോട് പ്രതികരിക്കുകയായിരുന്നു സിപിഐ സംസ്ഥാന സെക്രട്ടറി. ഹോസ്റ്റലിൽ ചെന്നായ്ക്കളെപ്പോലെ ചാടിവീണ് കുരുന്ന് വിദ്യാർഥികളെ മർദിക്കാൻ ഉത്തരവിട്ടത് ആരാണെന്നും ബിനോയ് വിശ്വം ചോദിച്ചു.
ഇത് കേരളം പൊറുക്കാൻ പോകുന്നില്ല. ബിജെപിയുമായുള്ള രാഷ്ട്രീയബന്ധമടക്കം മുഖ്യമന്ത്രിക്ക് പലതും മറച്ചുവയ്ക്കാനുണ്ടാകും. ബിജെപിക്കെതിരേയെന്ന് പറഞ്ഞാണ് യൂത്ത് കോൺഗ്രസ് പ്രകടനം നടത്തിയത്. പക്ഷേ ബിജെപിക്കെതിരായ പ്രകടനത്തിന്‍റെ ഇരകളായത് എസ്എഫ്ഐ സഖാക്കളാണെന്നും അദ്ദേഹം അഭിപ്രായപ്പെട്ടു. കുഞ്ഞുങ്ങളെ ആക്രമിക്കാൻ ഇടതുപക്ഷം അനുവദിക്കില്ലെന്നും ബിനോയ് വിശ്വം കൂട്ടിച്ചേർത്തു.
