ഹൈദരാബാദിൽ ഭക്ഷ്യ പരിശോധന; മായം കലർത്തിയ 500 കിലോ പനീർ പിടിച്ചെടുത്തു
ഹൈദരാബാദ്: ഹൈദരാബാദിലെ രണ്ട് ഭക്ഷ്യ ഉത്പാദന യൂണിറ്റുകളിൽ നടത്തിയ റെയ്ഡിൽ മായം കലർത്തിയ ഏകദേശം 500 കിലോയോളം പനീറും പാൽപൊടിയും മറ്റ് പാചക വസ്തുക്കളും പിടിച്ചെടുത്തു. ഭക്ഷ്യസുരക്ഷാ വിഭാഗവും പൊലിസും ചേർന്നാണ് പരിശോധന നടത്തിയത്.അൽവാൽ മേഖലയിലെ ‘നടരാജ് മിൽക്ക് ആൻഡ് മിൽക്ക് ഫുഡ് പ്രൊഡക്ട്സ്’, ദുണ്ടിഗൽ ബൗറാംപേട്ടിലെ ‘യശോദ സ്വീറ്റ് ആൻഡ് നംകീൻ’ എന്നീ സ്ഥാപനങ്ങളിലാണ് റെയ്ഡ് നടത്തിയത്. നിലവാരം കുറഞ്ഞ ഭക്ഷ്യവസ്തുക്കളുടെ ഉത്പാദനവും വിൽപനയും തടയുന്നതിന്റെ ഭാഗമായാണ നടപടി.
നടരാജ് മിൽക്ക് ആൻഡ് ഫുഡ് പ്രൊഡക്ട്സിൽ നിന്ന് പാൽപൊടി ഉപയോഗിച്ച് അനധികൃതമായി പനീർ നിർമിക്കുകയായിരുന്നു. 500 കിലോയോളം അഴുകിയ നിലയിലുള്ള പനീറും 50 കിലോ പാൽപൊടിയും പിടിച്ചെടുത്തു. സ്ഥാപന ഉടമ ജാപല നടരാജിനെ അൽവാൾ പൊലിസിന് കൈമാറി.
യശോദ സ്വീറ്റ് ആൻഡ് നംകീൻ ബേക്കറയിൽ നിന്ന് വനസ്പതി, പാചക എണ്ണ, മിൽക്ക് പൗഡർ എന്നിവ ഉപയോഗിച്ച് ഹൽവ നിർമിക്കുന്നതായി കണ്ടെത്തി. വിവിധ ബ്രാൻഡുകളിലുള്ള 80-ലധികം പാൽപൊടി ചാക്കുകൾ, 100 ടിൻ കുക്കിംഗ് ഓയിൽ, 50 ടിൻ ഡാൽഡ, 21 കിലോയോളം തയാറാക്കിയ ഹൽവ എന്നിവ ഇവിടെ നിന്ന് പിടിച്ചെടുത്തു.
ഹൈദരാബാദിലെ വിവിധ ഭാഗങ്ങളിലായി 20 ഡയറി യൂണിറ്റുകളിൽ പരിശോധന നടത്തുകയും മായം കലർത്തിയെന്ന് സംശയിക്കുന്ന 18 സാമ്പിളുകൾ ശേഖരിക്കുകയും ചെയ്തിട്ടുണ്ട്.
കൂടാതെ, വൃത്തിഹീനമായ സാഹചര്യത്തിൽ ലൈസൻസില്ലാതെ പ്രവർത്തിച്ച ഹയത്നഗറിലെ ‘വെങ്കട ശിവ മിൽക്ക് പോയിന്റ്’ അടപ്പിച്ചു. കർമാൻഘട്ടിലെ ‘സപ്തഗിരി ഫുഡ്സ്’, പസുമമുലയിലെ ‘ഓൾ റിച്ച് ഡയറി’ എന്നിവയുടെ ലൈസൻസുകളും റദ്ദാക്കിയിട്ടുണ്ട്.
