കേരള ലോട്ടറിയുടെ പേരില് വ്യാജ വെബ്സൈറ്റ് നിര്മിച്ച് തട്ടിപ്പ്; തമിഴ്നാട് സ്വദേശി പിടിയില്
തിരുവനന്തപുരം: ഓണ്ലൈന് കേരള ലോട്ടറി തട്ടിപ്പ് നടത്തിയ കേസില് തമിഴ്നാട് സ്വദേശി അറസ്റ്റില്. തമിഴ്നാട് തഞ്ചാവൂര് സ്വദേശി ദിനേശ് (25) ആണ് അറസ്റ്റിലായത്. വ്യാജ വെബ്സൈറ്റുകള് ഉണ്ടാക്കിയാണ് ഇയാള് ലോട്ടറി തട്ടിപ്പ് നടത്തിയത്. തിരുവനന്തപുരം സിറ്റി സൈബര് പൊലീസാണ് പ്രതിയെ പിടികൂടിയത്. സര്ക്കാര് മുദ്രകളും വിലാസവും ദുരുപയോഗം ചെയ്താണ് ഇയാള് വ്യാജ വെബ്സൈറ്റുകള് നിര്മിച്ചത്.
keralalotteryonlinebuy.com, keralalotteryonlinepurchase.com, keralalotteryonlinebooking.com എന്നിങ്ങനെയുള്ള വ്യാജ വെബ്സൈറ്റുകളാണ് ദിനേശ് നിര്മിച്ചത്. ഇത് വഴിയായിരുന്നു ഇയാള് തട്ടിപ്പ് നടത്തിയിരുന്നത്. വാട്സ്ആപ്പ് വഴി ക്യൂആര് കോഡും യുപിഐ ഐഡിയും നല്കി പണം വാങ്ങുകയും പാര്സലായി ടിക്കറ്റ് അയക്കാമെന്ന് വാഗ്ദാനം നൽകുന്നതുമായിരുന്നു ഇയാളുടെ രീതി.
ലോട്ടറി വകുപ്പ് നല്കിയ പരാതിയില് ഡൊമൈന് വിവരങ്ങളും യുപിഐ ഇടപാടുകളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. സംഭവത്തിന് പിന്നാലെ കേരള ഭാഗ്യക്കുറി ഓണ്ലൈനായി വില്ക്കുന്നില്ലെന്ന് പൊലീസ് ജാഗ്രതാ നിര്ദേശം നല്കിയിട്ടുണ്ട്.
