13കാരി 27 ആഴ്ച ഗർഭിണി, ഗര്ഭം അലസിപ്പിക്കാൻ അനുമതി നൽകി കോടതി, ബലാത്സംഗത്തിനിരയായെന്ന് പരാതി
ജയ്പൂർ: ബലാത്സംഗത്തിന് ഇരയായി ഗർഭിണിയായ 13 വയസ്സുകാരിയുടെ 27 ആഴ്ചയും ആറ് ദിവസവും പ്രായമുള്ള ഗർഭം അലസിപ്പിക്കാൻ രാജസ്ഥാൻ ഹൈക്കോടതിയുടെ സിംഗിൾ ബെഞ്ച് അനുമതി നൽകി. ഗർഭസ്ഥ ശിശു അതിജീവിച്ചാൽ ആശുപത്രി ഇൻകുബേഷൻ ക്രമീകരണങ്ങൾ നടത്തണമെന്നും സംസ്ഥാന സർക്കാരിന്റെ ചെലവിൽ കുട്ടിയെ വളർത്തണമെന്നും കോടതി പറഞ്ഞു. ഗർഭസ്ഥ ശിശു മരിച്ചാൽ, ഡിഎൻഎ പരിശോധനാ റിപ്പോർട്ട് സൂക്ഷിക്കാൻ കോടതി ഉത്തരവിട്ടു.
പെൺകുട്ടിയുടെ ഗർഭം കണ്ടെത്തിയതിനെത്തുടർന്ന് മാർച്ച് 3 ന് ബലാത്സംഗത്തിന് എഫ്ഐആർ രജിസ്റ്റർ ചെയ്തു. സംഭവം പുറത്തുപറയാതിരിക്കാൻ പ്രതി പെൺകുട്ടിയെയും കുടുംബത്തെയും ഭീഷണിപ്പെടുത്തിയതായും ആരോപണമുയർന്നു. അതിജീവിതയോട് ഇന്ന് മെഡിക്കൽ ബോർഡിന് മുന്നിൽ ഹാജരാകാനും ആവശ്യപ്പെട്ടു. ജയ്പൂരിലെ സംഗനേരി ഗേറ്റിലുള്ള മഹിളാ ചികിത്സാലയ മെഡിക്കൽ സൂപ്രണ്ടിനോട് നടപടിക്രമങ്ങൾക്കുള്ള ക്രമീകരണങ്ങൾ ചെയ്യാൻ ജസ്റ്റിസ് സുദേഷ് ബൻസൽ നിർദ്ദേശിച്ചു. പരാതിക്കാരി പ്രായപൂർത്തിയാകാത്ത പെൺകുട്ടിയാണ്. അവളുടെ മാതാപിതാക്കളും ഗർഭം അലസിപ്പിക്കാൻ സമ്മതം നൽകിയിട്ടുണ്ട്. ശസ്ത്രക്രിയ ഇടപെടലിന്റെ ഉയർന്ന അപകടസാധ്യത മാതാപിതാക്കളെ അറിയിച്ചു. ഗർഭം അലസിപ്പിക്കാൻ അനുവദിക്കുന്നില്ലെങ്കിൽ കുട്ടിയുടെ മാനസികാരോഗ്യത്തിന് ഗുരുതരമായ ദോഷം ചെയ്യുമെന്ന് കോടതിയെ അറിയിച്ചു. ഹൈക്കോടതികളും സുപ്രീം കോടതിയും 28 ആഴ്ച ഗർഭിണിയായ സ്ത്രീക്ക് പോലും ഗർഭഛിദ്രം അനുവദിച്ചിട്ടുള്ള നിരവധി കേസുകളുണ്ടെന്ന് കോടതിയെ അറിയിച്ചെന്നും അഭിഭാഷക പറഞ്ഞു.
