പത്തുവര്ഷം കാത്തുവെച്ച സത്യസന്ധത; ഒടുവില് സ്വര്ണമോതിരം ഉടമയുടെ കൈകളില്

മലപ്പുറം: പത്തുവര്ഷം മുമ്പ് വിവാഹസല്ക്കാരത്തിനിടെ വീണുകിട്ടിയ സ്വര്ണമോതിരം ഉടമയെ കണ്ടെത്തി തിരികെ നല്കി മാതൃകയായി വീട്ടമ്മ. വേങ്ങൂര് ഐലക്കര സ്വദേശിനി പാതിരമണ്ണ സുബൈദയാണ് നീണ്ട പത്തുവര്ഷത്തെ കാത്തിരിപ്പിനൊടുവില് സ്വര്ണമോതിരം യഥാര്ഥ ഉടമയ്ക്ക് കൈമാറിയത്. കാലം എത്ര കഴിഞ്ഞിട്ടും മറ്റൊരാളുടെ സ്വത്ത് സ്വന്തമാക്കാതെ സൂക്ഷിച്ച സുബൈദയുടെ സത്യസന്ധതയ്ക്ക് നാടിന്റെ അഭിനന്ദനവും ലഭിക്കുകയാണ്.
പത്തുവര്ഷം മുമ്പ് മേലാറ്റൂര് ചെമ്മാണിയോടുള്ള ഒരു ഓഡിറ്റോറിയത്തില് നടന്ന വിവാഹസല്ക്കാരത്തിനിടെയാണ് സുബൈദയ്ക്ക് സ്വര്ണമോതിരം ലഭിച്ചത്. അതിഥികളെല്ലാം മടങ്ങിയതിനുശേഷമാണ് ഓഡിറ്റോറിയത്തില്നിന്ന് മോതിരം വീണുകിട്ടിയത്. ഉടമയെ കണ്ടെത്തി തിരികെ നല്കണമെന്ന ആഗ്രഹത്തോടെ അന്നുതന്നെ അന്വേഷണം ആരംഭിച്ചെങ്കിലും ആരുടേതാണെന്ന് കണ്ടെത്താനായില്ല. പലരോടും അന്വേഷിച്ചെങ്കിലും ഫലമുണ്ടായില്ല.
എന്നെങ്കിലും ഉടമയെ കണ്ടെത്താനാകുമെന്ന പ്രതീക്ഷയില് മോതിരം ഇത്രയും കാലം സുരക്ഷിതമായി സൂക്ഷിക്കുകയായിരുന്നു സുബൈദ. വര്ഷങ്ങള് പിന്നിട്ടിട്ടും ആ ശ്രമം ഉപേക്ഷിക്കാന് അവര് തയ്യാറായില്ല. ഒടുവില് സാമൂഹികമാധ്യമങ്ങളുടെ സഹായത്തോടെ ഉടമയെ കണ്ടെത്താന് തീരുമാനിക്കുകയായിരുന്നു. ഇതിനായി സാമൂഹികമാധ്യമങ്ങളിലൂടെ മരണവാര്ത്തകള് കൈകാര്യം ചെയ്യുന്ന താമരത്ത് ഹംസുവിന്റെ സഹായം തേടി.



