ശിവസൂര്യ പാലക്കാട്ട്?… അജ്ഞാതന്റെ സന്ദേശം; വിവരമെത്തിയത് ദുരൂഹതകൾ നിറഞ്ഞ ഫോണിൽ നിന്ന്

തലശേരി: ചൊക്ലി രാമവിലാസം ഹയർ സെക്കൻഡറി സ്കൂൾ വിദ്യാർഥിയായ കരിയാട് പുളിയനമ്പ്രത്തെ ശിവപ്രിയത്തിൽ എ. ജിഗീഷിന്റെ മകൻ ശിവസൂര്യയെ പാലക്കാട് പുത്തൂരിൽ കണ്ടതായി റിപ്പോർട്ട്.
കഴിഞ്ഞ ദിവസമാണ് ഇതുസംബന്ധിച്ച അജ്ഞാതന്റെ ഫോൺ കോൾ ബന്ധുക്കൾക്ക് ലഭിച്ചത്. വിവരമറിഞ്ഞയുടൻ ക്രൈംബ്രാഞ്ച് സംഘം പാലക്കാട്ടെത്തി അന്വേഷണം ആരംഭിച്ചു. ശിവസൂര്യയെ പാലക്കാട് കണ്ടതായി സന്ദേശം നൽകിയ ഫോൺ പിന്നീട് സ്വിച്ച് ഓഫായത് ദുരുഹത പടർത്തിയിട്ടുണ്ട്.
പെരിന്തൽമണ്ണയിൽ വച്ചാണ് മൊബൈൽ സ്വിച്ച് ഓഫായിട്ടുള്ളത്. സ്വിച്ച് ഓഫ് ആയ ഫോണിൽ ഇതുവരെ 24 സിമ്മുകൾ ഉപയോഗിച്ചതായും പൊലീസ് കണ്ടെത്തി. ഇത് സംഭവത്തെ കൂടുതൽ ദുരൂഹതയിലേക്ക് നയിച്ചിട്ടുണ്ട്. ഫോണിന്റെ ഉടമയുടെ വീട് കണ്ടെത്തിയെങ്കിലും ഫോൺ ഉപയോഗിച്ചയാളെ കണ്ടെത്താൻ സാധിച്ചിട്ടില്ല. ഇയാളുടെ ജീവിത പശ്ചാത്തലം പൊലിസ് അന്വേഷിച്ചു വരികയാണ്. ഇയാളെ കണ്ടെത്താനുള്ള തീവ്രശ്രമത്തിലാണ് പൊലിസ്.
ശിവസൂര്യയെ കാണാതായിട്ട് ഇന്നു 100 ദിവസം പിന്നിടുകയാണ്. ലോക്കൽ പൊലിസും സ്പഷൽ ഇൻവെസ്റ്റിഗേഷൻ ടീമിനും പിന്നാലെ ക്രൈംബ്രാഞ്ച് സംഘവും അന്വേഷണം നടത്തിയെങ്കിലും ശിവസൂര്യയെക്കുറിച്ച് യാതൊരു വിവരവും ലഭിച്ചിരുന്നില്ല. ഇതിനിടയിലാണ് കുട്ടിയെ പാലക്കാട് പുത്തൂരിൽ കണ്ടതായുള്ള വിവരം വന്നിട്ടുള്ളത്.
ക്രൈംബ്രാഞ്ച് എസ്പി കെ.വി. വേണുഗോപാൽ, ഡിവൈഎസ്പി സനിൽകുമാർ, സിഐമാരായ ശ്രീജിത്ത് കൊടേരി, രഞ്ജിത്ത് രവീന്ദ്രൻ എന്നിവരുടെ നേതൃത്വത്തിലുള്ള സംഘമാണ് ഇപ്പോൾ കേസ് അന്വേഷിക്കുന്നത്. മൊബൈൽ ഫോൺ അച്ഛൻ പിടിച്ചുവച്ചതിനെ തുടർന്ന് “ഞാൻ കാശിയിലേക്ക് പോകുന്നു. ഇനിയുള്ള ജീവിതം അവിടെ ജീവിച്ച് ദൈവത്തോടലിയും” എന്ന കുറിപ്പ് എഴുതിവചചാണ് ശിവസൂര്യ കഴിഞ്ഞ ഓഗസ്റ്റ് എട്ടിന് വീടു വിട്ടത്.
അതിനിടെ ശിവസൂര്യയെ കണ്ടെത്തണമെന്നാവശ്യപ്പെട്ട് ജനകീയ പ്രതിഷേധം ഉയർത്തിക്കൊണ്ടുവരാൻ ആക്ഷൻ കമ്മിറ്റി തീരുമാനിച്ചിട്ടുണ്ട്. ഇതിന്റെ ഭാഗമായി ഇന്ന് പ്രതിഷേധ മാർച്ച് നടത്തും. വൈകുന്നേരം 4.30 ന് ചൊക്ലി രാമവിലാസം ഹയർ സെക്കൻഡറി സ്കൂൾ പരിസരത്ത് നിന്നാരംഭിച്ച് കാഞ്ഞിരം ടൗണിൽ സമാപിക്കും.
കാരായി രാജൻ എംഎൽഎ ഉദ്ഘാടനം ചെയ്യും. മുൻ മന്ത്രി കെ.പി. മോഹനൻ, സിപിഎം കണ്ണൂർ ജില്ലാ സെക്രട്ടേറിയറ്റംഗം പി. ഹരീന്ദ്രൻ, എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്, ഡിവൈഎഫ്ഐ ജില്ലാ സെക്രട്ടറി മുഹമ്മദ് അഫ്സൽ, ബാലാവകാശ കമ്മിഷൻ മുൻ ചെയർപേഴ്സൺ അഡ്വ. മനോജ് കുമാർ, മുതിർന്ന അഭിഭാഷകൻ പി.എ. പൗരൻ, ശിവസൂര്യയുടെ കുടുബാംഗങ്ങൾ, വിവിധജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുക്കും.




