അടുത്ത പ്രധാനമന്ത്രിയാകാൻ രാഹുൽ ഗാന്ധിക്കും അവകാശവാദമുന്നയിക്കാൻ അവകാശമെന്ന് സിപിഎം; ആദ്യ പരിഗണന ഭൂരിപക്ഷം നേടാനെന്ന് എം എ ബേബി
ദില്ലി: അടുത്ത പൊതുതെരഞ്ഞെടുപ്പിൽ പ്രതിപക്ഷം ഭൂരിപക്ഷം നേടിയാൽ ലോക്‌സഭയിലെ പ്രതിപക്ഷ നേതാവെന്ന നിലയിൽ പ്രധാനമന്ത്രി പദവിയിലേക്ക് അവകാശവാദമുന്നയിക്കാൻ കോൺഗ്രസ് നേതാവ് രാഹുൽ ഗാന്ധിക്ക് അവകാശമുണ്ടെന്ന് സിപിഎം ജനറൽ സെക്രട്ടറി എം എ ബേബി. എന്നാൽ പ്രധാനമന്ത്രി ആരാകണമെന്ന് തെരഞ്ഞെടുപ്പ് ഫലത്തിന് ശേഷം മാത്രമേ തീരുമാനിക്കാവൂ എന്നും അദ്ദേഹം കൂട്ടിച്ചേർത്തു. പ്രതിപക്ഷ സഖ്യം വിജയം കൈവരിച്ചാൽ നേതാവിനെ തിരഞ്ഞെടുക്കുന്ന കാര്യത്തിൽ കക്ഷികൾ ആവശ്യത്തിന് പക്വത കാണിക്കുമെന്ന് ബേബി പ്രത്യാശ പ്രകടിപ്പിച്ചു.
1996-ൽ യുണൈറ്റഡ് ഫ്രണ്ട് ഏറ്റവും വലിയ ഒറ്റക്കക്ഷിയായപ്പോൾ മുൻ പശ്ചിമ ബംഗാൾ മുഖ്യമന്ത്രി ജ്യോതി ബസുവിനെ പ്രധാനമന്ത്രിയാക്കണമോ എന്ന് സിപിഎം കേന്ദ്ര കമ്മിറ്റി ചർച്ച ചെയ്ത കാര്യം അദ്ദേഹം ഉദാഹരണമായി ചൂണ്ടിക്കാട്ടി. പാർട്ടിയുടെ നിലവിലെ ശക്തിവച്ച് പ്രധാനമന്ത്രി പദവിക്ക് അവകാശവാദമുന്നയിക്കുന്നത് യുക്തിസഹമല്ലെന്നും അതിനാൽ സ്വാഭാവികമായും പ്രതിപക്ഷ നേതാവിന് മുന്നോട്ടുവരാൻ അവകാശമുണ്ടെന്നുമാണ് അദ്ദേഹത്തിന്‍റെ നിരീക്ഷണം.
തെരഞ്ഞെടുപ്പിന് മുൻപ് മുന്നണി നേതൃത്വത്തെക്കുറിച്ച് ഊഹാപോഹങ്ങളിൽ ഏർപ്പെടാൻ സിപിഎം ആഗ്രഹിക്കുന്നില്ല. തമിഴ്‌നാട്ടിൽ ബിജെപിയുടെ പരാജയത്തിന് ശേഷം സിനിമാതാരവും രാഷ്ട്രീയ നേതാവുമായ ജോസഫ് വിജയ്‍യുടെ പേര് വരെ ഭാവി പ്രധാനമന്ത്രിയായി ചർച്ച ചെയ്യപ്പെടുന്നുണ്ടെന്ന് പരാമർശിച്ച അദ്ദേഹം, അത്തരം വിവാദപരമായ ചർച്ചകളിലേക്ക് കടക്കാൻ താല്പര്യപ്പെടുന്നില്ലെന്നും വ്യക്തമാക്കി. ആദ്യം പ്രതിപക്ഷം ഭൂരിപക്ഷം നേടുക എന്നതിനായിരിക്കണം പ്രഥമ പരിഗണനയെന്നും പ്രധാനമന്ത്രിയെ തെരഞ്ഞെടുപ്പ് ഫലം വന്ന ശേഷം തീരുമാനിക്കാമെന്നും അദ്ദേഹം ആവർത്തിച്ചു.
