കണ്ണൂർ: സൗത്ത് റെയിൽവേ സ്റ്റേഷന് സമീപം വന്ദേ ഭാരത് എക്സ്പ്രസിന് നേരെ കല്ലെറിഞ്ഞ സംഭവത്തിൽ പ്രതി അറസ്റ്റിൽ. കടലായി തോണിയോട്ട് കൂടുംപള്ളി വീട്ടിൽ സി.വി. ലിനീഷ് ആണ് അറസ്റ്റിലായത്. തലശ്ശേരി സി.ജെ.എം. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഈ കഴിഞ്ഞ 21-ന് വൈകിട്ട് തിരുവനന്തപുരത്തേക്ക് പോവുകയായിരുന്ന വന്ദേ ഭാരത് എക്സ്പ്രസിന് നേരെയായിരുന്നു ആക്രമണം. കല്ലേറിൽ ട്രെയിൻ കോച്ചിന്റെ വിൻഡോ ഗ്ലാസിന് കേടുപാടുകൾ സംഭവിക്കുകയും തോന്നുറായിരത്തിലധികം രൂപയുടെ നാശനഷ്ടം ഉണ്ടാവുകയും ചെയ്തിരുന്നു. സി.സി.ടി.വി. ദൃശ്യങ്ങൾ കേന്ദ്രീകരിച്ച് രഹസ്യാന്വേഷണ വിഭാഗം നടത്തിയ വിപുലമായ പരിശോധനയിലാണ് പ്രതിയെ തിരിച്ചറിഞ്ഞത്. മദ്യലഹരിയിൽ സുഹൃത്തുക്കളുമായി ഉണ്ടായ തർക്കത്തെ തുടർന്നുണ്ടായ ദേഷ്യത്തിലാണ് ട്രെയിനിന് നേരെ കല്ലെറിഞ്ഞതെന്ന് ഇയാൾ ചോദ്യം ചെയ്യലിൽ സമ്മതിച്ചതായി ആർ.പി.എഫ്. അറിയിച്ചു. ആർ.പി.എഫ്. ഇൻസ്പെക്ടർ ജെ. വർഗീസ്, എസ്.ഐ. മനോജ് കുമാർ എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
