‘നിതിന് രാജിൻ്റെ മരണവാര്ത്ത കേട്ടപ്പോള് കലാഭവന് മണി പറഞ്ഞത് ഓര്ത്ത് പോയി’: വൈകാരിമായ കുറിപ്പുമായി വിനയന്
തിരുവനന്തപുരം: കണ്ണൂര് അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജിന്റെ മരണവാര്ത്ത കേട്ടപ്പോള് കരിമാടിക്കുട്ടന് എന്ന ചിത്രത്തിന്റെ സെറ്റില് വച്ച് കലാഭവന് മണി പറഞ്ഞ വാക്കുകളാണ് തനിക്ക് ഓര്മ വന്നതെന്ന് സംവിധായകന് വിനയന്. ഫേസ്ബുക്ക് കുറിപ്പിലൂടെയാണ് കലാഭവൻ മണി പങ്കുവെച്ച വൈകാരിക അനുഭവം വിനയന് പങ്കുവെച്ചത്.
നമ്മുടെ നാട്ടില് ഇപ്പോള് ജാതിയുടേയും നിറത്തിന്റെയും പേരില് വേര്തിരിവ് വേര്തിരിവ് ഇല്ലെന്ന് അധ്യാപകര് പോലും പറയുന്നു. എന്നാല് താന് സ്കൂളില് പഠിച്ചിരുന്ന കാലത്ത് മാര്ക്ക് കുറഞ്ഞ ചിലരെ ശകാരിക്കുമ്പോള് മിക്കപ്പോഴും സംപൂജ്യനായ താന് ഉള്പ്പെടെയുള്ള മറ്റൊരു വിഭാഗത്തെ മാഷുമാര് പരിഹസിക്കുകയായിരുന്നു പതിവെന്ന് മണി പറഞ്ഞതായി വിനയന് കുറിപ്പില് പറയുന്നു. തൊലിയുരിക്കുന്ന രീതിയിലുള്ള പരിഹാസം കേട്ട് മറ്റ് കുട്ടികള് ചിരിക്കും പുലയനും പറയനും സ്കൂളിലെ പഠിത്തം പറഞ്ഞിട്ടില്ലെന്നാണ് മാഷ് പറയുന്നത്. ഈ ജന്മത്തോട് തന്നെ പുച്ഛം തോന്നിയിട്ടുണ്ടെന്നും മണി പറഞ്ഞതായി വിനയന് പോസ്റ്റില് പറയുന്നു.
