എൻഎച്ച് ഉദ്ഘാടനത്തിന് ബദലുമായി സംസ്ഥാന സർക്കാർ; ഉച്ചയ്ക്ക് 12 മണിക്ക് മന്ത്രി മുഹമ്മദ് റിയാസിന്റെ റോഡ് ഷോ

കോഴിക്കോട്: പ്രധാനമന്ത്രി പങ്കെടുക്കുന്ന ദേശീയപാത ഉദ്ഘാടനത്തിന് ബദൽ പരിപാടിയുമായി സംസ്ഥാന സർക്കാർ. പൊതുമരാമത്ത് മന്ത്രി മുഹമ്മദ് റിയാസ് കോഴിക്കോട്ട് ദേശീയപാതയിൽ റോഡ് ഷോ നടത്തും. ഉച്ചയ്ക്ക് 12 മണിക്ക് രാമനാട്ടുകര-വെങ്ങളം റീച്ചിലാണ് റോഡ് ഷോ. ദേശീയപാത ഉദ്ഘാടന ചടങ്ങിൽ പങ്കെടുപ്പിക്കാത്ത പശ്ചാത്തലത്തിലാണ് റോഡ് ഷോ.
പ്രധാനമന്ത്രി പങ്കെടുക്കുന്ന ദേശീയപാത ഉദ്ഘാടന ചടങ്ങിൽ മന്ത്രി മുഹമ്മദ് റിയാസിന് ക്ഷണമില്ലാത്തതിൻ്റെ പേരിൽ സംസ്ഥാന സർക്കാർ ചടങ്ങ് ബഹിഷ്‌കരിച്ചിരുന്നു. സംസ്ഥാന സർക്കാരിന്റെ കൂടി പങ്കാളിത്തത്തോടെയാണ് ദേശീയപാത വികസനം. ദേശീയപാതയുടെ ഉദ്ഘാടനം നടക്കുന്ന സമയത്ത് സ്വാഭാവികമായും അവിടെ ഉണ്ടായിരിക്കേണ്ട മന്ത്രിക്ക് ക്ഷണമില്ലാതിരിക്കുന്നത് ശരിയല്ലെന്നും ജനാധിപത്യപരമായ മര്യാദയല്ലെന്നും മന്ത്രി മുഹമ്മദ് റിയാസ് പ്രതികരിച്ചിരുന്നു.