ബെംഗളൂരു സർവീസുൾപ്പെടെ കേരളത്തിലേക്ക് രണ്ട് വന്ദേ ഭാരതുകൾ ഉടൻ? കൊച്ചിയിലെ മൂന്നാം ടെർമിനൽ പ്രതീക്ഷയേകുന്നു

കൊച്ചി: മലയാളികളുടെ ദീർഘനാളത്തെ കാത്തിരിപ്പിനൊടുവിൽ കൂടുതൽ വന്ദേ ഭാരത് എക്സ്പ്രസ് ട്രെയിനുകൾ കേരളത്തിലേക്കെത്താൻ വഴിയൊരുങ്ങുന്നു. എറണാകുളത്തെ റെയിൽവേ മാർഷലിങ് യാർഡ് പ്രദേശത്ത് മൂന്നാമത്തെ ടെർമിനൽ പൂർത്തിയായാൽ ബെംഗളൂരു വന്ദേ ഭാരതുൾപ്പെടെ നിലവിൽ സംസ്ഥാനത്തേക്ക് പരിഗണിക്കുന്ന രണ്ട് വന്ദേ ഭാരതുകൾ സർവീസ് ആരംഭിച്ചേക്കും. പുതിയ ടെർമിനൽ നിർമിക്കുന്നതു സംബന്ധിച്ച് റെയിൽവേ പഠനം തുടങ്ങിക്കഴിഞ്ഞു.

സംസ്ഥാനത്ത് കൂടുതൽ വന്ദേ ഭാരത് ട്രെയിൻ സർവീസുകൾ നടത്താൻ റെയിൽവേ പദ്ധതിയിടുന്നുണ്ടെന്ന റിപ്പോർട്ടുകൾ നേരത്തെ പുറത്തുവന്നിരുന്നു. ഇവ നിർത്തിയിടാനും അറ്റകുറ്റപ്പണികൾക്കുമായാകും പുതിയ ടെർമിനൽ ഉപയോഗിക്കുക. വന്ദേ ഭാരതിനു മാത്രമായോ, മെമു ഉൾപ്പെടെ എല്ലാ ട്രെയിനുകളും കയറ്റാവുന്ന തരത്തിലോ മൂന്നാം ടെർമിനൽ നിർമിക്കാനാണ്‌ ആലോചന.

എറണാകുളത്ത് മൂന്നാം റെയിൽവേ ടെർമിനൽ
തിരുവനന്തപുരം റെയിൽവേ ഡിവിഷൻ അധികൃതർ മൂന്നാം ടെർമിനലിൻ്റെ വിശദാംശങ്ങൾ ശേഖരിച്ച് ഉന്നതതല ചർച്ചകൾ നടത്തി. വൈകാതെ വിശദ രൂപരേഖ റെയിൽവേ ബോർഡിനു സമർപ്പിക്കും. ഇതനുസരിച്ചാകും നിർമാണത്തിലേക്ക് കടക്കുക. മൂന്നാം ടെർമിനൽ നിർമിക്കാൻ സ്ഥലം ഏറ്റെടുക്കേണ്ടില്ല എന്നതാണ് ടെർമിനൽ നിർമാണത്തിന് അനുയോജ്യമായ പ്രധാനഘടകം.

നഗരത്തോടുചേർന്ന രണ്ട്‌ പ്രദേശങ്ങളാണ്‌ മൂന്നാം ടെർമിനലിനായി പരിഗണിക്കുന്നത്‌. 16 പ്ലാറ്റ്‌ഫോമുകളും ആറ് പിറ്റ്-ലൈനുകളും സ്റ്റാളുകളും ഉൾപ്പെടെ സൗകര്യങ്ങൾ നിർമിക്കേണ്ടതിനാൽ പൊന്നുരുന്നിയിലെ റെയിൽവേയുടെ 110 ഏക്കർ പ്രദേശത്തെ മാർഷലിങ്‌ യാർഡ്‌ ആണ് ഒന്നാമതായി പരിഗണിക്കുന്നത്‌. ഇരുമ്പനത്തെ ഗുഡ്‌സ്‌ യാർഡാണ്‌ രണ്ടാമത്തേത്. ട്രെയിനുകൾ നിർത്തിയിടാനും തൃശൂർ, കോട്ടയം, ആലപ്പുഴ ഭാഗങ്ങളിലേക്ക്‌ തടസ്സം കൂടാതെ വന്ദേ ഭാരത്‌ ഉൾപ്പെടെ ട്രെയിനുകൾ ഓടിക്കാനും സൗകര്യപ്രദമായ സ്ഥലം എന്നത് ഇരുമ്പനത്തിനും സാധ്യത നൽകുന്നു.

രണ്ട് വന്ദേ ഭാരതുകൾ കേരളത്തിലേക്ക്
ടെർമിനൽ നിർമാണം പൂർത്തിയായാൽ കേരളത്തിലെ വന്ദേ ഭാരത് എക്സപ്രസുകളുടെ എണ്ണം നാലായി ഉയർന്നേക്കും. പുതിയ നാല് സർവീസുകൾക്കുള്ള ശുപാർശ റെയിൽവേയുടെ പരിഗണനയിലാണ്. ഇതിൽ രണ്ടെണ്ണമാകും എറണാകുളത്ത് ടെർമിനൽ ആരംഭിക്കുന്നതോടെ ഓടിത്തുടങ്ങുക. ബെംഗളൂരു വന്ദേ ഭാരത് സ്ലീപ്പർ ട്രെയിൻ ഉൾപ്പെടെയാണിത്. മെയ് മാസത്തിൽ ദക്ഷിണ റെയിവേ ജനറൽ മാനേജർ പാലക്കാട്, തിരുവനന്തപുരം ഡിവിഷനുകളിൽ വിളിച്ച എംപിമാരുടെ യോഗത്തിൽ പുതിയ വന്ദേ ഭാരത് സർവീസുകൾ പരിഗണിക്കാമെന്ന് ഉറപ്പ് നൽകിയിരുന്നു.

പാലക്കാട് – തിരുവനന്തപുരം വന്ദേ ഭാരത് , തിരുവനന്തപുരം – ബെംഗളൂരു വന്ദേ ഭാരത് സ്ലീപ്പർ എന്നിവയ്ക്കാണ് സാധ്യത തെളിയുന്നത്. നിലവിൽ കേരളത്തിൽ സർവീസ് നടത്തുന്ന രണ്ട് വന്ദേ ഭാരതും രാജ്യത്ത് തന്നെ ഒക്യുപെൻസി റേറ്റിൽ മുന്നിലാണ് ഈ സാഹചര്യത്തിലാണ് പുതിയ വന്ദേ ഭാരതുകൾ എത്തിയേക്കുമെന്ന പ്രതീക്ഷ. ഇവയ്ക്ക് പുറമെ ഗോവ – മംഗലാപുരം റൂട്ടിൽ ഓടുന്ന വന്ദേ ഭാരത് ട്രെയിൻ കോഴിക്കോടേക്ക് നീട്ടാനും, കോയമ്പത്തൂർ – മംഗലാപുരം റൂട്ടിൽ പുതിയ വന്ദേ ഭാരത് ആരംഭിക്കാനും സാധ്യതയുണ്ട്.