‘കേരള സ്റ്റേറ്റ്’ എന്ന ബോർഡ് വച്ച സ്വകാര്യ കാറുകൾ സംസ്ഥാനത്ത് പെരുകുന്നു. സർക്കാരിന്‍റെ ഏതെങ്കിലും ഒരു ക്ഷേമനിധി ബോർഡിലോ കോർപറേഷനിലോ അംഗങ്ങളായിട്ടുള്ളവർ പോലും സ്വന്തം വാഹനങ്ങളിൽ കേരള സ്റ്റേറ്റ് എന്ന ബോർഡ് വച്ചു പായുകയാണ്. കഴിഞ്ഞ എൽഡിഎഫ് സർക്കാരിന്‍റെ കാലത്തു ലഭിച്ച ബോർഡ് മെംബർ സ്ഥാനം വച്ചാണ് ഈ നിയമലംഘനം നടത്തുന്നത്. അതും ചുവന്ന ബോർഡിൽ വെളുത്ത അക്ഷരവുമായിട്ടാണ് വാഹനങ്ങളുടെ പാച്ചിൽ.
കൃഷിവകുപ്പിന്‍റെ വാഹനമാണെങ്കിൽ കൃഷിവകുപ്പ് എന്നാണു രേഖപ്പെടുത്തേണ്ടത്. പകരം കേരള സ്റ്റേറ്റ് എന്ന ബോർഡ് സ്ഥാപിച്ചാൽ മോട്ടോർ വാഹന വകുപ്പിന് നിയമനടപടി സ്വീകരിക്കാമെന്ന നിയമമുള്ളപ്പോഴാണ് ഇത്തരമൊരു പ്രവണത കേരളത്തിൽ വളരുന്നത്.
‘കേരള സ്റ്റേറ്റ്’ എന്ന ബോർഡ് സംസ്ഥാന മന്ത്രിമാർക്കോ തത്തുല്യപദവി വഹിക്കുന്നവർക്കോ നൽകിയിട്ടുള്ള വാഹനത്തിൽ മാത്രമേ പ്രദർശിപ്പിക്കാവൂയെന്നും അല്ലാത്ത വാഹനങ്ങളിൽ കണ്ടാൽ നടപടിയെടുക്കാനും ട്രാൻസ്പോർട്ട് കമ്മീഷണറായിരുന്നപ്പോൾ ടോമിൻ ജെ. തച്ചങ്കരി നിർദേശം നൽകിയതാണ്.
സംസ്ഥാന സർക്കാർ വാഹനങ്ങൾ, തദ്ദേശ സ്വയംഭരണ സ്ഥാപനങ്ങൾ, ഭരണഘടനാപരമായ അധികാര സ്ഥാപനങ്ങൾ എന്നിവയുടെ വാഹനത്തിലൊന്നും ‘കേരള സ്റ്റേറ്റ്’ എന്ന ബോർഡ് പാടില്ല. പലയിടത്തും ചില വകുപ്പുകളുടെ വാഹനത്തിൽ കേരള സർക്കാർ എന്ന ബോർഡാണ് പ്രദർശിപ്പിച്ചിട്ടുള്ളത്. അത്തരം വാഹനങ്ങളിൽനിന്ന് ബോർഡ് നീക്കം ചെയ്യിക്കണമെന്നും പിഴയീടാക്കണമെന്നും നിർദേശമുണ്ട്.
കളക്ടർമാരുടെ വാഹനത്തിൽ മുന്നിലും പിന്നിലും ജില്ലാ കളക്ടർ എന്ന ബോർഡ് വയ്ക്കാം. പൊതുമേഖലാ സ്ഥാപനങ്ങൾ, ബോർഡുകൾ, അർധസർക്കാർ സ്ഥാപനങ്ങൾ എന്നിവയ്ക്ക് അതത് സ്ഥാപനത്തിന്‍റെ പേരുള്ള ബോർഡ് മാത്രമേ വയ്ക്കാനാവൂ. ചിലർ അത്തരം വാഹനങ്ങൾക്കും കേരള സ്റ്റേറ്റ് എന്ന് ബോർഡ് വയ്ക്കുന്നുണ്ട്. തദ്ദേശ സ്വയംഭരണ സ്ഥാപനങ്ങളുടെ വാഹനത്തിൽ മുന്നിലും പിന്നിലും തലവന്‍റെ ഒൗദ്യോഗിക പദവി സൂചിപ്പിക്കുന്ന ബോർഡ് വയ്ക്കാം. രജിസ്ട്രേഷൻ നന്പർ മറയ്ക്കുന്ന രീതിയിൽ ഒരു ബോർഡും പ്രദർശിപ്പിക്കാൻ പാടില്ല.