കണ്ണൂർ: മദ്യമില്ലാത്ത സമൂഹം സൃഷ്ടിക്കാൻ ജനങ്ങൾ കക്ഷിരാഷ്ട്രീയ ഭേദമന്യേ മുന്നോട്ടുവരണമെന്ന് കണ്ണൂർ ബിഷപ് ഡോ. അലക്സ് വടക്കുംതല. പൊതുതെരഞ്ഞെടുപ്പ് ഇതിനുള്ള ഒരു അവസരമാണ് ജനങ്ങൾക്ക് നൽകിയതെന്നും മദ്യനിരോധനത്തിനൊരു വോട്ട് എന്നതാകട്ടെ ഓരോ വോട്ടർമാരുടെയും കർത്തവ്യമെന്നും അദ്ദേഹം പറഞ്ഞു. കുടുംബ സമാധാനവും സ്വസ്ഥമായ ജീവിതവും ലക്ഷ്യമാക്കുന്ന സർക്കാരുകൾ മദ്യം ഒഴുക്കുന്നതിലൂടെ ജനവഞ്ചനയാണ് കാണിക്കുന്നതെന്ന് അദ്ദേഹം ഓർമിപ്പിച്ചു. “മദ്യമില്ലാത്ത ഒരു കേരളത്തിനാവട്ടെ നിങ്ങളുടെ ഒരു വോട്ട്’ എന്ന സന്ദേശം ഉയർത്തി കേരള മദ്യനിരോധന സമിതി സംസ്ഥാന കമ്മിറ്റിയുടെ ജാഥയ്ക്ക് കണ്ണൂർ ഗാന്ധി സ്ക്വയറിൽ നടന്ന സ്വീകരണ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സമിതി ജില്ലാ പ്രസിഡന്റ് രാജൻ തീയറേത്ത് അധ്യക്ഷത വഹിച്ചു. ജാഥാ ലീഡർ സംസ്ഥാന ജനറൽ സെക്രട്ടറി പ്രഫ. ടി.എം. രവീന്ദ്രൻ, സംസ്ഥാന സെക്രട്ടറി ടി.പി.ആർ. നാഥ്, ശിവഗിരിമഠം സ്വാമി പ്രേമാനന്ദ, ജില്ലാ വൈസ് പ്രസിഡന്റ് ദിനു മൊട്ടമ്മൽ, ജില്ലാ സെക്രട്ടറി ആർട്ടിസ്റ്റ് ശശികല, വനിതാ പ്രസിഡന്റ് ഐ.സി. മേരി, പി.ജെ. തോമസ്, സിസ്റ്റർ നോബിൾ, സിസ്റ്റർ ജ്യോത്സന, റിൻസി കുര്യൻ, വത്സമ്മ പനമറ്റം എന്നിവർ പ്രസംഗിച്ചു. പുതിയതെരു, ധർമശാല, തളിപ്പറമ്പ്, പയ്യന്നൂർ എന്നിവിടങ്ങളിലും സ്വീകരണം നൽകി.