സ്വാതന്ത്ര്യദിനം പ്രമാണിച്ച് യാത്രക്കാർക്ക് ഇളവുകളുമായി കൊച്ചി മെട്രോ. ഇന്ന് മെട്രോ യാത്രയ്‌ക്കായുള്ള പരമാവധി ടിക്കറ്റ് നിരക്ക് 20 രൂപ ആയിരിക്കും. 20 രൂപ നിരക്കിൽ ഏതിടത്തേക്കും യാത്ര ചെയ്യാം. മിനിമം ടിക്കറ്റ് നിരക്ക് 10 രൂപയായി തുടരും. 30, 40,50, 60 ടിക്കറ്റുകൾക്കെല്ലാം 10, 20, 30, 40 എന്നിങ്ങനെ ഇളവുകൾ ലഭിക്കും.
രാവിലെ ആറ് മുതൽ രാത്രി 11 വരെ ഈ നിരക്കുകൾ തുടരും. പേപ്പർ ക്യുആർ, ഡിജിറ്റൽ ക്യൂആർ, കൊച്ചി വൺ കാർഡ് എന്നിവയ്ക്കും ഇളവുകൾ ലഭ്യമാണ്. കൊച്ചി വൺ കാർഡ് ഉപയോഗിക്കുന്നവർക്ക് കാഷ്‌ബാക്കായാണ് ഇളവ് ലഭിക്കുകയെന്നും അധികൃതർ അറിയിച്ചു.