പശ്ചിമേഷ്യൻ സംഘർഷത്തിന് അയവുവരുത്താൻ നീക്കം; ഡൊണാൾഡ് ട്രംപുമായി ഫോണിൽ ചർച്ച നടത്തി ഖത്തർ അമീർ
പശ്ചിമേഷ്യൻ മേഖലയിലെ സംഘർഷങ്ങൾ പരിഹരിക്കാനും സുരക്ഷ ഉറപ്പാക്കാനുമുള്ള നയതന്ത്ര ശ്രമങ്ങളുടെ ഭാഗമായി ഖത്തർ അമീർ ഷെയ്ഖ് തമീം ബിൻ ഹമദ് അൽതാനിയും യുഎസ് പ്രസിഡന്റ് ഡൊണാൾഡ് ട്രംപും ഫോണിൽ ചർച്ച നടത്തി. മേഖലയിലുണ്ടായിട്ടുള്ള ഗുരുതര പ്രതിസന്ധിക്ക് പരിഹാരമായി സമഗ്രമായ കരാറിലെത്താൻ ഖത്തർ നടത്തുന്ന മധ്യസ്ഥ ശ്രമങ്ങളെക്കുറിച്ചാണ് ഇരു നേതാക്കളും പ്രധാനമായും സംസാരിച്ചത്.
ഫോൺ സംഭാഷണത്തിൽ മേഖലയിൽ കൂടുതൽ സംഘർഷങ്ങൾ ഉണ്ടാകുന്നത് ഒഴിവാക്കേണ്ടതിന്റെ പ്രാധാന്യം ഖത്തർ അമീർ എടുത്തുപറഞ്ഞു. അന്താരാഷ്ട്ര തലത്തിൽ ഹോർമൂസ് കടലിടുക്കിലൂടെയുള്ള (Strait of Hormuz) സുരക്ഷിതമായ കപ്പൽ ഗതാഗതം ഉറപ്പുവരുത്തേണ്ടതുണ്ടെന്നും ആഗോള ഊർജ്ജ വിതരണ ശൃംഖല തടസ്സമില്ലാതെ സംരക്ഷിക്കേണ്ടതുണ്ടെന്നും അദ്ദേഹം വ്യക്തമാക്കി.
അമേരിക്കയ്ക്കും ഇറാനും ഇടയിൽ സമഗ്രമായ കരാറിലെത്താൻ ഖത്തർ നടത്തുന്ന മധ്യസ്ഥ നീക്കങ്ങൾ ഏകോപിപ്പിക്കുന്നതിനെക്കുറിച്ചും ഇരുനേതാക്കളും ആശയവിനിമയം നടത്തി. മേഖലയിൽ ശാശ്വതമായ സമാധാനവും സ്ഥിരതയും കൈവരിക്കാൻ എല്ലാ കക്ഷികളും നയതന്ത്ര പാതയിലൂടെ മുന്നോട്ട് പോകണമെന്നാണ് ഖത്തറിന്റെ നിലപാട്.ഖത്തറും യുഎസും തമ്മിലുള്ള ശക്തമായ ഉഭയകക്ഷി ബന്ധത്തെക്കുറിച്ചും തന്ത്രപ്രധാന വിഷയങ്ങളിലെ സഹകരണത്തെക്കുറിച്ചും ചർച്ചയിൽ പരാമർശമുണ്ടായി. മേഖലയിൽ സമാധാനം കൊണ്ടുവരാനുള്ള നയതന്ത്ര ശ്രമങ്ങൾ തുടരുമെന്ന് ഖത്തർ ഔദ്യോഗിക പ്രസ്താവനയിലൂടെ വ്യക്തമാക്കി.
