ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഇന്ത്യാ സഖ്യത്തിന്‍റെ നേതൃത്വത്തിൽ പ്രതീകാത്മക ജനകീയ വിചാരണ ആരംഭിച്ചു. എഐസിസി പ്രസിഡന്‍റ് മല്ലികാർജുൻ ഖാർഗെയുടെ ഡൽഹിയിലെ ഔദ്യോഗിക വസതിയിലാണ് പരിപാടി സംഘടിപ്പിച്ചത്. തെരഞ്ഞെടുപ്പ് കമ്മീഷണർ നിഷ്പക്ഷത നഷ്ടപ്പെടുത്തിയെന്നും ഭരണഘടനാ ലംഘനം നടത്തിയെന്നുമുള്ള ആരോപണങ്ങളാണ് പ്രതിപക്ഷം ഉയർത്തുന്നത്.
മുൻ ലോക്‌സഭാ സ്പീക്കർ മീരാ കുമാറിന്‍റെ നേതൃത്വത്തിലാണ് ജനകീയ വിചാരണയുടെ നടപടികൾ പുരോഗമിക്കുന്നത്. വോട്ടർമാരുടെ അവകാശങ്ങൾ നിഷേധിച്ചുവെന്നും സുപ്രീംകോടതിയിൽ തെറ്റായ സത്യവാംഗ്മൂലം സമർപ്പിച്ചുവെന്നും ഉൾപ്പെടെയുള്ള ആരോപണങ്ങൾ ഉന്നയിച്ച് ഗ്യാനേഷ് കുമാറിനെതിരായ പൗര കുറ്റപത്രവും പ്രതിപക്ഷം അവതരിപ്പിച്ചു.
മല്ലികാർജുൻ ഖാർഗെ, രാഹുൽ ഗാന്ധി തുടങ്ങിയ പ്രമുഖ രാഷ്ട്രീയ നേതാക്കൾക്കു പുറമെ മുൻ സുപ്രീംകോടതി ജഡ്ജിമാർ, നിയമവിദഗ്ധർ, സാമൂഹിക പ്രവർത്തകർ എന്നിവരും പ്രതീകാത്മക പാർലമെന്‍ററി നടപടികളിൽ പങ്കാളികളായി. പ്രതിഷേധ പരിപാടിയുടെ പശ്ചാത്തലത്തിൽ ഖാർഗെയുടെ വസതിക്ക് മുന്നിലും ഡൽഹിയിലെ പ്രധാന മേഖലകളിലും കനത്ത സുരക്ഷയാണ് ഏർപ്പെടുത്തിയിരിക്കുന്നത്.
