നെടുമ്പാശ്ശേരി മിനി കൂപ്പര്‍ അപകടം: വാഹനങ്ങളുടെ അമിതവേഗതയില്‍ ആശങ്ക പ്രകടിപ്പിച്ച് ഹൈക്കോടതി
കൊച്ചി: നെടുമ്പാശ്ശേരിയില്‍ 19കാരന്‍ ഓടിച്ച കാറിടിച്ച് മൂന്ന് പേര്‍ മരിച്ച സംഭവത്തിന്റെ പശ്ചാത്തലത്തില്‍ വാഹനങ്ങളുടെ അമിത വേഗതയില്‍ ആശങ്ക പ്രകടിപ്പിച്ച് കേരള ഹൈക്കോടതി. നിരത്തിലെ അച്ചടക്കത്തിലും റോഡ് സുരക്ഷയിലുമാണ് ഡിവിഷന്‍ ബെഞ്ച് ആശങ്ക പ്രകടിപ്പിച്ചിരിക്കുന്നത്. അമിത വേഗത കണ്ടെത്താന്‍ വിദഗ്ധ ടീമിനെ നിയോഗിച്ച് സംവിധാനം ഒരുക്കണമെന്നും കോടതി നിര്‍ദേശിച്ചു. വേഗത ഡ്രൈവര്‍മാര്‍ക്ക് ഒരു പ്രേത്സാഹനമാകരുതെന്നും കോടതി ഓര്‍മിപ്പിച്ചു. വാഹനങ്ങളുടെ അമിത വേഗത കണ്ടെത്താന്‍ നിലവിലെ ട്രാഫിക്ക് ക്യാമറകള്‍ക്ക് കഴിയുമോയെന്ന് സംസ്ഥാന ഗതാഗത വകുപ്പിനോട് ഡിവിഷന്‍ ബെഞ്ച് ആരാഞ്ഞു. അമിതവേഗതയില്‍ ഉടനടി നടപടി സ്വീകരിക്കാനാകുമോയെന്നും ഗതാഗതവകുപ്പിനോട് കോടതി ചോദിച്ചിട്ടുണ്ട്. നിരവധി തവണ ഇക്കാര്യത്തില്‍ ഹൈക്കോടതി ഉള്‍പ്പെടെയുള്ള കോടതികളുടെ ഇടപെടലുകള്‍ ഉണ്ടായിട്ടും ചെറിയ മാറ്റങ്ങള്‍ മാത്രമാണ് സംഭവിക്കുന്നതെന്നും കോടതി നിരീക്ഷിച്ചു.
നെടുമ്പാശ്ശേരി അപകടത്തില്‍ പ്രതി സുഹൈല്‍ സജീവ് വാഹനം ഓടിച്ചത് 200കിലോമീറ്റര്‍ വേഗതയിലാണെന്ന് ഹൈക്കോടതി ചൂണ്ടിക്കാട്ടി. എഐ ക്യാമറയില്‍ ഇക്കാര്യം വ്യക്തമാണ്. അമിതവേഗതയും അപകടവും അവസാനിപ്പിക്കാന്‍ പുതിയ സാധ്യത സ്വീകരിക്കണം. ഉയര്‍ന്ന പ്രകടന ശേഷിയുള്ള കാറുകള്‍ രാത്രിയില്‍ അമിതവേഗതിയില്‍ ഓടിക്കുന്ന സാഹചര്യമുണ്ട്, 100 – 150 കിലോമീറ്റര്‍ അധികം വേഗതയില്‍ സഞ്ചരിക്കുന്ന ഈ വാഹനങ്ങള്‍ ബ്രേക്ക് ചെയ്താല്‍ പോലും ഉടനടി നില്‍ക്കില്ല. അതിനാല്‍ ഇത്തരം രീതികള്‍ക്ക് പ്രായോഗികമായ പരിഹാരമുണ്ടാകണം. സര്‍ക്കാരിന്റെ ഔപചാരിക മറുപടിയല്ല വേണ്ടതെന്നും ഇക്കാര്യത്തില്‍ ഗതാഗതവകുപ്പ് പത്തുദിവസത്തിനകം മറുപടി നല്‍കണമെന്നുമാണ് ഹൈക്കോടതി ഡിവിഷന്‍ ബഞ്ചിന്റെ നിര്‍ദേശം.
ഇക്കഴിഞ്ഞ ഞായറാഴ്ച പുലര്‍ച്ചെ പന്ത്രണ്ടരയോടെയാണ് മദ്യലഹരിയില്‍ 19കാരനായ സുഹൈല്‍ സജീവ് ഓടിച്ച മിനി കൂപ്പര്‍ കാര്‍ മൂന്നുപേര്‍ സഞ്ചരിച്ചിരുന്ന സ്‌കൂട്ടറില്‍ ഇടിച്ചത്. വയനാട് സ്വദേശി ദേവിക, പാലക്കാട് സ്വദേശി ഗോപിക, കര്‍ണാടക സുള്ള്യ സ്വദേശി ഇയാസ് എന്നിവര്‍ അപകടത്തില്‍ തല്‍ക്ഷണം മരിച്ചിരുന്നു. തൃക്കാക്കര കരകൗശല വില്‍പനശാലയില്‍ പാര്‍ട്ട് ടൈം ജോലി ചെയ്യുന്നവരായിരുന്നു മരിച്ച മൂന്ന് വിദ്യാര്‍ത്ഥികളും. സ്ഥാപനത്തിലെ സഹപ്രവര്‍ത്തകര്‍ക്കൊപ്പം രാത്രിയില്‍ ചായ കുടിച്ച് മടങ്ങിവരവെയാണ് അപകടമുണ്ടായത്. അപകടസമയം സുഹൈലിനൊപ്പം മൂന്ന് സുഹൃത്തുക്കള്‍ കൂടിയുണ്ടായിരുന്നു. ഇതില്‍ രണ്ട് പേര്‍ അപകടത്തിന് തൊട്ടുപിന്നാലെ മറ്റൊരു വാഹനത്തില്‍ കയറി രക്ഷപ്പെടുകയായിരുന്നു. സുഹൈലിനൊപ്പം പിടിയിലായ നിനവിനെ ചോദ്യം ചെയ്തതില്‍ നിന്നാണ് മറ്റ് രണ്ട് പേര്‍ കൂടി കാറിലുണ്ടായിരുന്നുവെന്ന് വ്യക്തമായത്. തുടര്‍ന്ന് ആലപ്പുഴ സ്വദേശികളായ ജോയല്‍, അമീന്‍ എന്നിവരെ പൊലീസ് കസ്റ്റഡിയില്‍ എടുക്കുകയായിരുന്നു.
