ഒഡീഷ തീരത്തിന് സമീപം ബംഗാൾ ഉൾക്കടലിൽ പനാമ പതാകയുള്ള ചരക്കുകപ്പൽ മുങ്ങി; 24 ജീവനക്കാരിൽ 2 പേരെ രക്ഷപ്പെടുത്തി
ഭുവനേശ്വർ: ഒഡീഷ തീരത്തിന് സമീപം ബംഗാൾ ഉൾക്കടലിൽ പനാമ പതാകയുള്ള എംവി ഓഷ്യൻ വിന്നർ (MV Ocean Winner) എന്ന ചരക്കുകപ്പൽ മുങ്ങി. ശനിയാഴ്ചയാണ് സംഭവം. കപ്പലുമായുള്ള ആശയവിനിമയം നഷ്ടമായതിനെ തുടർന്ന് ഇന്ത്യൻ കോസ്റ്റ് ഗാർഡും ഇന്ത്യൻ നാവികസേനയും സംയുക്തമായി വ്യാപകമായ തിരച്ചിൽ-രക്ഷാപ്രവർത്തനം ആരംഭിച്ചിട്ടുണ്ട്.
കപ്പലിൽ ആകെ 24 ജീവനക്കാരാണ് ഉണ്ടായിരുന്നത്. ഇതിൽ 20 ചൈനീസ് പൗരന്മാരും, മൂന്ന് മ്യാൻമർ സ്വദേശികളും, ഒരു ബംഗ്ലാദേശ് പൗരനും ഉൾപ്പെടുന്നതായി ഇന്ത്യൻ കോസ്റ്റ് ഗാർഡ് അറിയിച്ചു. ഇതിനകം രണ്ടുപേരെ ജീവനോടെ രക്ഷപ്പെടുത്തിയിട്ടുണ്ട്. ശേഷിക്കുന്ന 22 പേരെ കണ്ടെത്താനുള്ള തിരച്ചിൽ തുടരുകയാണ്. എംവി ഓഷ്യൻ വിന്നറുമായുള്ള ആശയവിനിമയം നഷ്ടമായതായി വിവരം ലഭിച്ചതിന് പിന്നാലെയാണ് കപ്പൽ മുങ്ങിയതെന്ന് കോസ്റ്റ് ഗാർഡ് വ്യക്തമാക്കിയത്. ഇരുമ്പയിര് കയറ്റി സിംഗപ്പൂരിലേക്ക് പോകുകയായിരുന്ന കപ്പൽ വെള്ളിയാഴ്ചയാണ് ഒഡീഷ തീരത്ത് നിന്ന് യാത്ര തിരിച്ചത്. പരദീപ് തീരത്തുനിന്ന് ഏകദേശം 240 നോട്ടിക്കൽ മൈൽ അകലെയാണ് കപ്പൽ മുങ്ങിയത്.
