ശബരിമല: ചിങ്ങമാസ പൂജകള്ക്കായി ശബരിമല ക്ഷേത്ര നട തുറന്നു. വൈകിട്ട് അഞ്ചിന് തന്ത്രി കണ്ഠരര് ബ്രഹ്മദത്തന്റെ സാന്നിധ്യത്തില് മേല്ശാന്തി ഇഡി പ്രസാദ് നടതുറന്ന് ശ്രീകോവിലില് ദീപം തെളിയിച്ചു. ശേഷം പതിനെട്ടാം പടിക്ക് താഴെ അഗ്നി പകര്ന്നു.
ചിങ്ങം ഒന്ന് നാളെ പുലര്ച്ചെ അഞ്ച് മണിക്ക് ദര്ശനത്തിനായി നട തുറക്കും. ചിങ്ങം ഒന്ന് മുതല് വൈകീട്ട് ദീപാരാധനയ്ക്ക് ശേഷം പതിനെട്ടാം പടിയില് പടി പൂജ ഉണ്ടായിരിക്കും. ചിങ്ങ മാസ പൂജകള് പൂര്ത്തിയാക്കി ആഗസ്റ്റ് 21 ന് രാത്രി പത്ത് മണിക്ക് നട അടയ്ക്കും. തുടര്ന്ന് തിരുവോണ പൂജക്കായി ആഗസ്റ്റ് 24 ന് വൈകിട്ട് നട വീണ്ടും തുറക്കും.
ശബരിമല ഉള്ക്കഴകത്തെ തിരഞ്ഞെടുക്കുന്നതിനുള്ള നറുക്കെടുപ്പും പമ്പാ ഗണപതി ക്ഷേത്രം മേല്ശാന്തി തിരഞ്ഞെടുപ്പും നാളെ നടക്കും. രാവിലെ ഉഷ പൂജക്ക് ശേഷമായിരിക്കും തിരഞ്ഞെടുപ്പ് നടത്തുക. മേല്ശാന്തിയെ പൂജാ കാര്യങ്ങളില് സഹായിക്കുക എന്നതാണ് ഉള്ക്കഴകത്തിന്റെ ചുമതല.
ചിങ്ങമാസ പൂജയുടെ ഭാഗമായി ശബരിമല ദര്ശനം നടത്താന് ആഗ്രഹിക്കുന്നവര് വെര്ച്വല് ക്യൂ വഴി മുന്കൂട്ടി ബുക്കിങ് നടത്തണം. ഇതിനായി ഔദ്യോഗിക വെബ്സൈറ്റായ www.sabarimalaonline.org വഴിയാണ് ദര്ശനസ്ലോട്ട് ഉറപ്പാക്കേണ്ടത്.
