വനിതാകമ്മീഷൻ അധ്യക്ഷ സ്ഥാനത്തേക്ക് ദീപ്തിയോ ഐഷ പോറ്റിയോ, ബോർഡ് കോർപ്പറേഷൻ വിഭജനം കോൺഗ്രസിന് കീറാമൂട്ടി
തിരുവനന്തപുരം; സർക്കാർ അധികാരത്തിലെത്തിയ ശേഷം നടന്ന ആദ്യയുഡിഎഫ് യോഗത്തിൽ ബോർഡ് കോർപ്പറേഷൻ വിഭജനത്തിൽ വിശദമായ ചർച്ച നടത്താനായില്ല. ഉഭയകക്ഷി ചർച്ചകൾ നടത്താൻ തീരുമാനിച്ചാണ് പിരിഞ്ഞത്. ഇതിനിടെ കോൺഗ്രസിൽ അവകാശവാദം ശക്തമാക്കി മുതിർന്ന നേതാക്കൾ. കെപിസിസിക്ക് പുതിയ പ്രസിഡന്റ് ചർച്ചക്കൊപ്പം ബോർഡ് കോർപ്പറേഷൻ അധ്യക്ഷ സ്ഥാനചർച്ചകളും ഒരുമിച്ച് നടത്തുകയാണ്. കെപിസിസി മാധ്യമവിഭാഗത്തിലെ ദീപ്തി മേരി വർഗീസ്, സിപിഎമ്മിൽ നിന്ന് കോൺഗ്രസിലെത്തിയ ഐഷ പോറ്റി എന്നിവർ വനിതാ കമ്മീഷൻ അധ്യക്ഷ സ്ഥാനത്തേക്ക് താല്പര്യം അറിയിച്ചിട്ടുണ്ട്. കൊച്ചി കോർപ്പറേഷൻ അംഗമായ
ദീപ്തിക്ക് പാർട്ടിയിൽ പ്രധാനസ്ഥാനമാണ് കൂടുതൽ താല്പര്യം. അതില്ലെങ്കിൽ വനിതാ കമ്മീഷൻ അധ്യക്ഷ പോലെ പ്രമുഖപോസ്റ്റ് വേണം. കൊട്ടാരക്കരയിൽ ബാലഗോപാലിനെതിരെ ശക്തമായ മത്സരം കാഴ്ച്ച വച്ച ഐഷ പോറ്റിക്ക് വനിതാകമ്മീഷൻ അധ്യക്ഷ സ്ഥാനം കൊടുക്കണമെന്നാണ് സതീശൻ്റെ താല്പര്യം. മത്സരത്തിൽ നിന്ന് മാറി നിന്ന് കെ ബാബുവിനെ ജി സി ഡി എ അധ്യക്ഷ സ്ഥാനത്തേക്ക് പരിഗണിക്കുന്നുണ്ട്. ചലച്ചിത്ര അക്കാഡമി അധ്യക്ഷനായി സിനിമാക്കാരുടെ വൻനിര സമ്മർദ്ദം ചെലുത്തുന്നുണ്ട്. ഐഎഫ്എഫ്കെക്കുള്ള ഒരുക്കങ്ങൾ തുടങ്ങാൻ സമയം കഴിഞ്ഞിട്ടും അധ്യക്ഷനെ തീരുമാനിക്കാൻ കഴിഞ്ഞിട്ടില്ല. കെപിസിസിഅധ്യക്ഷനും രണ്ട് വർക്കിംഗ് പ്രസിഡൻ്റുമാരും മന്ത്രിമാരായതോടെ പാർട്ടി പ്രവർത്തനം നടക്കുന്നില്ല. പാർട്ടി അധ്യക്ഷനായി ഷാഫിയുടെ പേരാണ് കെ സി വിഭാഗം മുന്നോട്ട് വയ്ക്കുന്നത്. ജോസഫ് വാഴക്കനായി ചെന്നിത്തലയും പിടി മുറുക്കുന്നു. ബെന്നിയും ആൻ്റോയും കൊടിക്കുന്നിലും നീക്കങ്ങളിൽ സജീവമാണ്. ഈ തർക്കം രൂക്ഷമായതോടെ മറ്റ് ചർച്ചകൾ വഴി മുട്ടി.
ഘടകക്ഷികളും സമർദ്ദം ശക്തമാക്കി
ഭരണപരിഷക്കരണകമ്മീഷൻ അധ്യക്ഷനായി പി ജെ ജോസഫിനും എം കെ മുനീറിനും വേണ്ടി ഇരു പാർട്ടികളും രംഗത്തുണ്ട്. മുനീറിനെ വയോജനകമ്മീഷൻ അധ്യക്ഷസ്ഥാനത്തേക്കും പരിഗണിക്കുന്നുണ്ട്. ക്യാബിനറ്റ് റാങ്കോടെയുള്ള പദവി കെ പി എ മജീദിനും വേണമെന്നാണ് ലീഗിൻ്റെ ആഗ്രഹം. രണ്ടര വർഷത്തിന് ശേഷം മന്ത്രിയാക്കാമെന്ന് വാഗ്ദനമുള്ള മാണി സി കാപ്പൻ നോർക്ക വൈസ് ചെയർമാൻ പ്രതീക്ഷിക്കുന്നു. ദില്ലിയിലെ കേരളത്തിൻ്റെ പ്രത്യേകപദവിയാണ് ഫോർവേഡ് ബ്ലോക്ക് നേതാവ് ജി ദേവരാജൻ്റെ നോട്ടം.
