ശ്രീരാജ് പെൺകുട്ടികളെ ഉപദ്രവിക്കുന്നത് പതിവാക്കിയ ക്രിമിനൽ, പാവപ്പെട്ട നിരവധി പെൺകുട്ടികളെ പ്രതികൾ കുടുക്കിയിട്ടുണ്ട്’: വെളിപ്പെടുത്തലുമായി എസിപി

.
കൊച്ചി: കളമശ്ശേരി കൂട്ടബലാത്സം​ഗ കേസിലെ ഒന്നാം പ്രതി ശ്രീരാജ് സ്പായുടെ മറവിൽ പെൺകുട്ടികളെ ഉപദ്രവിക്കുന്നത് പതിവാക്കിയ ക്രിമിനലെന്ന് പൊലീസ്. ഏറെ നാളായി കുറ്റകൃത്യം നടന്നുവരികയായിരുന്നുവെന്ന് എസിപി ബിജോയ് ചന്ദ്രൻ ഏഷ്യാനെറ്റ് ന്യൂസിനോട് പ്രതികരിച്ചു. കേസിൽ പിടിയിലായ ശരണ്യയും ശ്രീരാജിന്റെ കെണിയിൽ വീണതാണെന്ന് സംശയിക്കുന്നതായും പൊലീസ് വ്യക്തമാക്കി. പാവപ്പെട്ട നിരവധി പെൺകുട്ടികളെ പ്രതികൾ കുടുക്കിയിട്ടുണ്ടെന്നും എസിപി പറഞ്ഞു.

വളരെ ആലോചിച്ച് നടപ്പാക്കുന്ന പ്രക്രിയ ആയിട്ടാണ് മനസിലാക്കുന്നത്. നാളുകളായി ഇത് നടന്നുവരുന്നു എന്നാണ് വിവരം. നിരാലംബരായ പെൺകുട്ടികളാണ് ഇതിൽ വന്നു പെട്ടുപോകുന്നത്. ശ്രീരാജിനെ കുറിച്ച് അന്വേഷിച്ചപ്പോൾ ഇവിടെയുള്ള പല സ്പാകൾക്കും സ്ത്രീകളെ എത്തിച്ചു കൊടുക്കുന്നത് പോലും ശ്രീരാജാണ് എന്നാണ് മനസിലായത്. പൊലീസുകാർ തങ്ങളുടെ സുഹൃത്തുക്കളാണ്, ഞങ്ങൾക്കൊപ്പം ​ഗുണ്ടകളുണ്ട് എന്നൊക്കെ പെൺകുട്ടികളോട് പറയുമ്പോൾ പിന്നീട് ഇവർക്കെതിരെ സംസാരിക്കാൻ ഈ സ്ത്രീകൾ ഭയന്ന് തയ്യാറാകില്ല. ഗുണ്ടാ ബന്ധം ഉൾപ്പെടെ പറഞ്ഞു ഭീഷണിപ്പെടുത്തും. സ്പാകളിൽ ചൂഷണത്തിന് ഇരയായവരെ പുനരധിവസിപ്പിക്കുമെന്നും എസിപി വ്യക്തമാക്കി