തൃശ്ശൂർ കൊടുങ്ങല്ലൂർ എറിയാടിൽ അപ്രതീക്ഷിത കടലേറ്റത്തിൽ മത്സ്യത്തൊഴിലാളികൾക്ക് കനത്ത നഷ്ടം. ഞായറാഴ്ച എറിയാട് ആറാട്ടുവഴി കടപ്പുറത്താണ് ശക്തമായ കടലേറ്റമുണ്ടായത്. കള്ളക്കടലിന് സമാനമായ വേലിയേറ്റമാണെന്നാണ് സൂചന.
കൂന്തൽ മത്സ്യം പിടിക്കാനായി കടലിൽ വീശിയ ഇരുപത്തിയഞ്ചോളം മത്സ്യബന്ധന വലകളാണ് കടലേറ്റത്തിൽ പൂർണമായി നശിച്ചത്. വലകൾ നഷ്ടപ്പെട്ടതിലൂടെ ലക്ഷക്കണക്കിന് രൂപയുടെ നാശനഷ്ടം സംഭവിച്ചതായി തൊഴിലാളികൾ പറഞ്ഞു. യാതൊരുവിധ കടൽക്ഷോഭ മുന്നറിയിപ്പും അധികൃതരുടെ ഭാഗത്തുനിന്ന് ലഭിച്ചില്ലെന്നും തൊഴിലാളികൾ വ്യക്തമാക്കി.
