ബാറിൽ സംഘർഷം; ചോദ്യം ചെയ്ത യുപി സ്വദേശിയെ ബിയർ കുപ്പി കൊണ്ട് തലയ്ക്കടിച്ചു, പ്രതിയ്ക്കെതിരെ വധശ്രമ കുറ്റം ചുമത്തി

തിരുവനന്തപുരം: വിഴിഞ്ഞത്തെ ബാറിലുണ്ടായ സംലർഷത്തിൽ ഇതര സംസ്ഥാനക്കാരന് പരിക്ക്. മുക്കോലയിലെ ബാറിൽ ഇരു സംഘങ്ങൾ തമ്മിൽ സംഘർഷമുണ്ടായപ്പോൾ ചോദ്യം ചെയ്ത വിരോധത്തിനാണ് യു പി സ്വദേശിയെ ബിയർ കുപ്പികൊണ്ട് തലയ്ക്കടിച്ച് പരിക്കേൽപ്പിച്ചത്. ശനിയാഴ്ച രാത്രി നടന്ന സംഭവത്തിൽ വിഴിഞ്ഞം കോട്ടപ്പുറം ഒസാവിള ഉന്നതി സ്വദേശി രാജേഷി(30)നെ വിഴിഞ്ഞം പൊലീസ് അറസ്‌റ്റ് ചെയ്തു. വിഴിഞ്ഞം അന്താരാഷ്ട്ര തുറമുഖത്ത് ജോലി ചെയ്യുന്ന ഉത്തർപ്രദേശ് സ്വദേശി ചഞ്ചൽ കുമാറി(26)നാണ് തലയ്ക്ക് ഗുരുതര പരുക്കേറ്റത്. ആക്രമണത്തിൽ ചഞ്ചൽ കുമാറിന്‍റെ തലയിൽ തുന്നലുകളുണ്ടെന്നും പ്രതിയ്ക്കെതിരെ വധശ്രമ കുറ്റം ചുമത്തിയതായും വിഴിഞ്ഞം പൊലീസ് അറിയിച്ചു. രാജേഷിനെതിരെ നിയമ നടപടികൾ സ്വീകരിച്ചു.