താമരശ്ശേരിയില് നാല് ദിവസത്തിനിടെ നാലാമത്തെ സംഭവം, വീട്ടുമുറ്റത്ത് നിന്ന് ചകിരിയെടുക്കുമ്പോൾ യുവതിക്ക് കൈയിൽ പാമ്പുകടിയേറ്റു.
കോഴിക്കോട്: വീട്ടുമുറ്റത്ത് ജോലി ചെയ്തുകൊണ്ടിരിക്കുകയായിരുന്ന യുവതിക്ക് പാമ്പ് കടിയേറ്റു. കോഴിക്കോട് താമരശ്ശേരിയിലാണ് സംഭവം. പൂനൂര് കോളിക്കല് വട്ടിക്കുന്നുമ്മല് റസീന(43) ക്കാണ് വീട്ടുമുറ്റത്ത് നിന്നും ചകിരിയെടുക്കുമ്പോള് പാമ്പിന്റെ കടിയേറ്റത്. റസീനയുടെ കൈയ്ക്കാണ് കടിയേറ്റത്. ഉടന്തന്നെ താമരശ്ശേരി താലൂക്ക് ആശുപത്രിയില് എത്തിച്ച് പ്രാഥമിക ചികിത്സ നല്കിയ ശേഷം കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റി.
കഴിഞ്ഞ നാലു ദിവസത്തിനിടെ റസീനയുടെ സംഭവമടക്കം താമരശ്ശേരിയിലും സമീപ പ്രദേശങ്ങളിലുമായി നാല് പേര്ക്കാണ് പാമ്പിന്റെ കടിയേറ്റത്. ഞായറാഴ്ച താമരശ്ശേരി കാരാടിയില് റോഡരികില് വെച്ച് യുവാവിനും തിങ്കളാഴ്ച കോരങ്ങാട് വയലിന് കളിച്ച് കൊണ്ടിരിക്കുകയായിരുന്ന 10 വയസ്സുകാരനും ഇന്നലെ വെളിമണ്ണ എന്ന സ്ഥലത്ത് മദ്രസ വിട്ട് വീട്ടിലേക്ക് മടങ്ങുകയായിരുന്ന അഞ്ചു വയസ്സുകാരിക്കുമാണ് പാമ്പുകടിയേറ്റത്.
