ജമ്മു കശ്മീർ സോജില പാസിലെ ഹിമപാതത്തിൽ മരണം 6 ആയി. വാഹനം വൻതോതിൽ മഞ്ഞുവീഴ്ചയിൽ പെട്ടതിനെ തുടർന്ന് അഞ്ച് പേരും സംഭവസ്ഥലത്ത് വെച്ചുതന്നെ മരണപ്പെടുകയായിരുന്നു. അഞ്ചോളം ആളുകൾക്ക് പരുക്കേറ്റിട്ടുണ്ട്. ഇവരെ വിദഗ്ദ്ധ ചികിത്സയ്ക്കായി അടുത്തുള്ള ആശുപത്രിയിലേക്ക് മാറ്റിയതായി ഉദ്യോഗസ്ഥൻ പറഞ്ഞു. ശ്രീനഗർ – ലേ ദേശീയപാതയിൽ ഗതാഗത തടസ്സം നേരിടുകയാണ്.
വാഹനങ്ങൾ ഇനിയും സ്ഥലത്ത് കുടുങ്ങി കിടക്കുന്നതായാണ് വിവരം. ഇവരെ പുറത്തെത്തിക്കാനുള്ള രക്ഷാപ്രവർത്തനവും മേഖലയിൽ നടക്കുകയാണ്. സംസ്ഥാന ദുരന്ത സേനയുടെയും, ബോർഡർ റോഡ് ഓർഗനൈസേഷന്റെയും നേതൃത്വത്തിലാണ് രക്ഷാപ്രവർത്തനം. കാർഗിലിൽ നിന്ന് ശ്രീനഗറിലേക്ക് പോയവരാണ് ഹിമ പാതത്തിൽ അകപ്പെട്ടത്. കനത്ത മഞ്ഞും മോശം കാലാവസ്ഥയും രക്ഷാപ്രവർത്തനത്തിന് വെല്ലുവിളി ഉയർത്തുന്നുണ്ട്. കാര്ഗില് ജില്ലയിലാണ് സോജിലാ പാസ് സ്ഥിതി ചെയ്യുന്നത്.
