മലപ്പുറം പാങ്ങില് ഒരു വയസുകാരന് ചികിത്സ ലഭിക്കാതെ മരിച്ചെന്ന പരാതി; കുട്ടിയുടെ മൃതദേഹം പോസ്റ്റ്മോര്ട്ടത്തിനായി പുറത്തെടുത്തു
മലപ്പുറം പാങ്ങില് മരിച്ച ഒരു വയസുകാരന്റെ മൃതദേഹം പോസ്റ്റ്മോര്ട്ടത്തിനായി പുറത്തെടുത്തു. നാളെ മഞ്ചേരി മെഡിക്കല് കോളജിലാണ് പോസ്റ്റ്മോര്ട്ടം. അശാസ്ത്രീയ ചികിത്സ പ്രോത്സാഹിപ്പിക്കുന്ന കോട്ടക്കല് സ്വദേശി ഹിറ അറീറ- നവാസ് ദമ്പതികളുടെ കുട്ടിയാണ് മരിച്ചത്. കുഞ്ഞ് ചികിത്സ ലഭിക്കാതെ മരിച്ചു എന്നാണ് പരാതി.
ഇന്നലെ മരിച്ച കുഞ്ഞിന്റെ കബറടക്കം ഇന്ന് രാവിലെയാണ് നടന്നത്. പരാതി ഉയര്ന്നതോടെ ഇന്ന് രാത്രിയോടെ കുഞ്ഞിന്റെ മൃതദേഹം പോസ്റ്റ്മാര്ട്ടതിനായി പുറത്തെടുത്തു. ഇന്ക്വസ്റ്റ് നടപടികള്ക്ക് ശേഷം പോസ്റ്റ്മോര്ട്ടത്തിനായി മഞ്ചേരി മെഡിക്കല് കോളജിലേക്ക് മൃതദേഹം മാറ്റി. നാളെ പോസ്റ്റ്മോര്ട്ടം നടക്കും. പടിഞ്ഞാറ്റുമുറി ജുമാമസ്ജിദില് ആയിരുന്നു കുട്ടിയുടെ മൃതദേഹം ഖബറടക്കിയത്. വാടകക്ക് താമസിക്കുന്ന കോട്ടക്കലിലെ വീട്ടില് വച്ചായിരുന്നു അന്ത്യം. പാല് കുടിച്ചതിനു പിന്നാലെ കുട്ടി കുഴഞ്ഞുവീണു മരിച്ചു എന്നാണ് കുടുംബം പറയുന്നത്.
കുഞ്ഞിന്റ മരണത്തില് ദുരൂഹത ആരോപിച്ചു കോട്ടക്കല് സ്വദേശി ഹംസത്ത് പൊലീസില് പരാതി നല്കിയതോടെയാണ് സംഭവം പുറത്തറിയുന്നത്.
