പതിനൊന്നാം ശന്പള കമ്മീഷന്റെ ശിപാർശ പ്രകാരം പെൻഷൻ പരിഷ്കരണത്തിന് 2019 ജൂലൈ ഒന്നു മുതൽ പ്രാബല്യം നൽകാൻ മന്ത്രിസഭ തീരുമാനിച്ചു. പരിഷ്കരിച്ച പെൻഷൻ ഈ വർഷം ഏപ്രിൽ മുതൽ നൽകിത്തുടങ്ങും. പാർട് ടൈം പെൻഷൻകാർക്കും ഇത് ബാധകമായിരിക്കും.ശന്പള പരിഷ്കരണവും ഇതേ തീയതി മുതലാണ് നടപ്പാക്കുന്നത്. നിലവിലെ രീതിയിൽ 30 വർഷത്തെ സേവനകാലത്തിന് മുഴുവൻ പെൻഷനും പത്തു വർഷത്തെ യോഗ്യതാ സേവനകാലത്തിനു ഏറ്റവും കുറഞ്ഞ പെൻഷനും നൽകുന്നതു തുടരും. ഏറ്റവും കുറഞ്ഞ അടിസ്ഥാന പെൻഷൻ 11,500 രൂപയായും ഏറ്റവും കൂടിയ അടിസ്ഥാന പെൻഷൻ 83,400 രൂപയായും ഉയർത്തും.
ഏറ്റവും കുറഞ്ഞ അടിസ്ഥാന കുടുംബ പെൻഷൻ 11,500 രൂപയായും ഏറ്റവും കൂടിയ അടിസ്ഥാന കുടുംബ പെൻഷൻ (സാധരണ നിരക്ക്) 50,040 രൂപയായും വർധിപ്പിക്കും. പെൻഷൻകാരുടെയും കുടുംബ പെൻഷൻകാരുടെയും മെഡിക്കൽ അലവൻസ് പ്രതിമാസം 500 രൂപയായി വർധിപ്പിക്കും. മെഡിക്കൽ ഇൻഷ്വറൻസ് പദ്ധതി നടപ്പാക്കുന്നതുവരെ ഈ അലവൻസ് തുടരും.