തൊണ്ടിയിൽ സെന്റ് ജോൺസ് യു.പി. സ്കൂളിൽ ഓണാഘോഷം സംഘടിപ്പിച്ചു

പേരാവൂർ:തൊണ്ടിയിൽ സെന്റ് ജോൺസ് യു.പി.സ്കൂളിലെ ഓണാഘോഷം മാവേലി മന്നൻമാർ പൂക്കൾ വിതറി ഉദ്‌ഘാടനം ചെയ്തു. പൂക്കള മത്സരവും വടംവലിയും ഓണപ്പാട്ട് മത്സരവും നടന്നു. കൂടാതെ നാടൻ കളികളുടെ മേളപ്പെരുമയും സംഘടിപ്പിച്ചു . റാണിയും കോലും, കൊത്തങ്കല്ല് കളി, അക്ക് കളി, ഡപ്പകളി, കുഴിപ്പന്ത്, തലപ്പന്ത് , ഗോലി കളി തുടങ്ങി പുതിയ കാലത്ത് മാഞ്ഞു പോകുന്ന വിവിധ കളികൾ കുട്ടികൾക്ക് പരിചയപ്പെടുത്തുകയും ആവേശപൂർവ്വം കുട്ടികൾ കളിക്കുകയും ചെയ്തു.
പി.ടി. എ യുടെ നേതൃത്വത്തിൽ തയ്യാറാക്കിയ വിഭവ സമൃദ്ധമായ ഓണസദ്യ, അധ്യാപകരും കുട്ടികളും ചേർന്നൊരുക്കിയ മലയാളത്തനിമ, വടംവലി മത്സരം, ഏറെ ആകർഷകമായ ഭീമൻ പൂക്കളം, ഓലപ്പന്ത് കെട്ടൽ തുടങ്ങിയവ ആകർഷകമായി. സ്കൂൾ പി.ടി.എ യും അധ്യാപകരും പരിപാടികൾക്ക് നേതൃത്വം വഹിച്ചു