ന്യൂയോർക്കിലെ ടൈംസ് സ്ക്വയറിൽ ബാങ്ക് ഓഫ് അമേരിക്ക വൈസ് പ്രസിഡന്റ് കുത്തേറ്റ് മരിച്ചു
ന്യൂയോർക്ക്: അമേരിക്കയിലെ ന്യൂയോർക്കിലുള്ള ടൈംസ് സ്ക്വയറിൽ ബാങ്ക് ഓഫ് അമേരിക്ക വൈസ് പ്രസിഡന്റ് കുത്തേറ്റ് മരിച്ചു. 32കാരിയായ എറിൻ പിയാസെന്റി ആണ് കൊല്ലപ്പെട്ടത്.49കാരിയായ പമേല സിസ്നെറോസ് ആണ് ആക്രമണം നടത്തിയത്. ഇവരെ സുരക്ഷാ ഉദ്യോഗസ്ഥർ വെടിവച്ചു കൊലപ്പെടുത്തി. ആക്രമണത്തിൽ 68കാരനും കുത്തേറ്റു. ഇയാളുടെ നില തൃപ്തികരമാണെന്ന് പൊലിസ് അറിയിച്ചു. പ്രതിക്ക് മാനസിക പ്രശ്നങ്ങൾ ഉണ്ടായിരുന്നതായി പൊലീസ് പറയുന്നു.
വെസ്റ്റ് 42 സ്ട്രീറ്റിനും സെവൻത് അവന്യുവിനും സമീപം തിങ്കളാഴ്ച ഉച്ചയോടെ ആണ് ആക്രമണം ഉണ്ടായത്. കൊലയാളിയായ പമേല സിസ്നെറോസ് ക്വീൻസ് സ്വദേശിയാണെന്നും ഒരു പ്രകോപനവും ഇല്ലാതെയാണ് ആക്രമണം നടന്നതെന്നും ന്യൂയോർക്ക് പൊലീസ് ഡിപ്പാർട്ട്മെന്റ് അറിയിച്ചു.
ഷോപ്പിംഗ് ബാഗിൽ സൂക്ഷിച്ചിരുന്ന രണ്ട് കത്തികൾ ഉപയോഗിച്ചാണ് പമേല സിസ്നെറോസ് ആക്രമണം നടത്തിയത്. ആദ്യം 68കാരനെ കുത്തിപ്പരിക്കേൽപ്പിച്ച അക്രമി, ഉടൻതന്നെ എറിൻ പിയാസെന്റിയെയും ആക്രമിക്കുകയായിരുന്നു.
സുരക്ഷാ ഉദ്യോഗസ്ഥർക്ക് നേരെ പാഞ്ഞടുക്കാൻ ശ്രമിക്കുന്നതിനിടെ ആണ് ഇവരെ വെടിവെച്ച് വീഴ്ത്തിയത്. പ്രതിക്ക് ഏറെ നാളായി മാനസിക പ്രശ്നങ്ങൾ ഉണ്ടായിരുന്നതായി ന്യൂയോർക്ക് പൊലിസ് ഡിപ്പാർട്ട്മെന്റ് കമ്മിഷണർ ജെസിക്ക ടിഷ് പറഞ്ഞു.
