കേന്ദ്രത്തിന് എതിരായ സമരം കോൺഗ്രസ് തടയുന്നു’; കേന്ദ്ര വിദ്യാഭ്യാസ മന്ത്രാലയം നീറ്റ് പരീക്ഷ നടത്താൻ പ്രാപ്തരല്ലെന്ന് എസ്എഫ്ഐ
കേന്ദ്രത്തിന് എതിരായ സമരം കോൺഗ്രസ് എന്തിനാണ് തടയുന്നതെന്ന് എസ്എഫ്ഐ അഖിലേന്ത്യാ പ്രസിഡന്റ് ആദർശ് എം സജി. ബുൾഡോസർ രാജിനെതിരെ എസ്എഫ്ഐ പ്രതിഷേധം സംഘടിപ്പിക്കുമെന്നും അദ്ദേഹം അറിയിച്ചു.മറ്റന്നാൾ രാജ്യവ്യാപകമായി പ്രതിഷേധം നടത്തുമെന്നും ആദർശ് എം സജി വ്യക്തമാക്കി. നീറ്റ് പരീക്ഷയിലെ ക്രമക്കേടുമായി ബന്ധപ്പെട്ടുണ്ടായ പ്രശ്നങ്ങളെക്കുറിച്ചും അദ്ദേഹം പ്രതികരിച്ചു.നീറ്റ് ക്രമക്കേട് എന്നത് ഒരു അഴിമതിയാണ്.നീറ്റ് ക്രമക്കേടിൽ ആറിലധികം വിദ്യാർഥികൾ ആത്മഹത്യ ചെയ്തു.ഇത് ആത്മഹത്യ അല്ല. കൊലപാതകങ്ങൾ ആണ്. കേന്ദ്ര വിദ്യാഭ്യാസ മന്ത്രാലയം നീറ്റ് പരീക്ഷ നടത്താൻ പ്രാപ്തരല്ല. ഒപ്പ് ശേഖരണത്തിനായി രൂപീകരിച്ച വെബ്സൈറ്റ് ബിജെപി ഹാക്ക് ചെയ്യാൻ ശ്രമിച്ചു. കേരളത്തിലെയും കർണാടകയിലെയും തെലങ്കാനയിലെയും കോൺഗ്രസ് സർക്കാരുകൾ എസ്എഫ്ഐ പ്രതിഷേധക്കാരെ അറസ്റ്റ് ചെയ്യുന്നു. കർണാടകയിലും തെലങ്കനയിലും പ്രതിഷേധത്തിന് അനുമതി നൽകില്ല. കേരളത്തിൽ 16 പേരെ അറസ്റ്റ് ചെയ്തു. കോൺഗ്രസ് എന്തിനാണ് പ്രതിഷേധത്തെ അടിച്ചമർത്തുന്നത്. കേന്ദ്രത്തിന് എതിരായ സമരം കോൺഗ്രസ് തടയുന്നുവെന്നും ആദർശ് എം സജീ പറഞ്ഞു.
