പനിക്ക് ചികിത്സ തേടിയെത്തിയ യുവാവിന് കാലാവധി കഴിഞ്ഞ ആന്റിബയോട്ടിക് നല്‍കി; സംഭവം പൂന്താനം കുടുംബാരോഗ്യ കേന്ദ്രത്തില്‍
മേലാറ്റൂര്‍: പനിക്ക് ചികിത്സ തേടിയെത്തിയ യുവാവിന് സര്‍ക്കാര്‍ കുടുംബാരോഗ്യ കേന്ദ്രത്തില്‍ നിന്ന് വിതരണം ചെയ്തത് കാലാവധി കഴിഞ്ഞ ആന്റിബയോട്ടിക് മരുന്ന്. പൂന്താനം സര്‍ക്കാര്‍ കുടുംബാരോഗ്യ കേന്ദ്രത്തില്‍ ചികിത്സയ്‌ക്കെത്തിയ കീഴാറ്റൂര്‍ കൊണ്ടിപറമ്പ് സ്വദേശിയായ 39കാരനാണ് കാലാവധി കഴിഞ്ഞ സിപ്രോഫ്‌ലോക്‌സാസിന്‍ മരുന്ന് നല്‍കിയത്. മരുന്നിന്റെ പാക്കറ്റില്‍ രേഖപ്പെടുത്തിയ കാലാവധി കഴിഞ്ഞതായി ശ്രദ്ധയില്‍പ്പെട്ടതോടെയാണ് സംഭവം പുറത്തറിഞ്ഞത്.
ചൊവ്വാഴ്ചയാണ് യുവാവ് പനിയെ തുടര്‍ന്ന് ചികിത്സ തേടി കുടുംബാരോഗ്യ കേന്ദ്രത്തിലെത്തിയത്. ഡോക്ടറുടെ നിര്‍ദേശപ്രകാരം നല്‍കിയ മരുന്നിന്റെ പാക്കറ്റില്‍ 2026 ആഗസ്റ്റ് വരെയാണ് കാലാവധി രേഖപ്പെടുത്തിയിരുന്നത്. എന്നാല്‍, നിലവിലെ തീയതി ഒക്ടോബറായതിനാല്‍ മരുന്നിന്റെ കാലാവധി രണ്ട് മാസം മുമ്പ് അവസാനിച്ചിരുന്നു.
സംഭവം ശ്രദ്ധയില്‍പ്പെട്ടതോടെ മരുന്ന് വിതരണത്തിലെ വീഴ്ച സംബന്ധിച്ച് ചര്‍ച്ചയായി. പഴയ മരുന്നുകള്‍ ഒഴിവാക്കിയിരുന്നുവെന്നും അറിയാതെ വിതരണത്തിനിടെ കാലാവധി കഴിഞ്ഞ മരുന്ന് ഉള്‍പ്പെട്ടതാണെന്നുമാണ് അധികൃതരുടെ വിശദീകരണം. കാലാവധി കഴിഞ്ഞ മരുന്ന് കഴിച്ചിട്ടുണ്ടോ, മരുന്ന് ഉപയോഗിച്ചതിനെ തുടര്‍ന്ന് യുവാവിന് ആരോഗ്യപ്രശ്‌നങ്ങളുണ്ടായോ തുടങ്ങിയ കാര്യങ്ങളില്‍ കൂടുതല്‍ വ്യക്തത ലഭിച്ചിട്ടില്ല. സംഭവത്തില്‍ തുടര്‍നടപടികള്‍ സ്വീകരിച്ചിട്ടുണ്ടോയെന്ന വിവരവും ലഭ്യമായിട്ടില്ല.
