ദുബായ്: വേഗമേറിയ യാത്രയ്ക്കൊപ്പം റോഡ് സുരക്ഷയും ഉറപ്പാക്കുന്നതിന്റെ ഭാഗമായി ദുബായിലെ അഞ്ച് പ്രധാന റോഡുകളിൽ വേഗപരിധി പുനർനിശ്ചയിച്ചു. പുതുക്കിയ വേഗപരിധി നവംബർ 1 മുതൽ പ്രാബല്യത്തിൽ വരുമെന്ന് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു.
യാത്രാക്ലേശം പരിഹരിക്കാനും ഗതാഗത സുരക്ഷ വർധിപ്പിക്കാനും ലക്ഷ്യമിട്ട് നടത്തിയ പഠനങ്ങൾക്കും വിശകലനങ്ങൾക്കും ശേഷമാണ് ആർ.ടി.എ. പുതിയ തീരുമാനം കൈക്കൊണ്ടത്. മൂന്ന് പ്രധാന റോഡുകളിൽ വേഗപരിധി വർധിപ്പിച്ചപ്പോൾ, ഗതാഗത സാന്ദ്രതയും അപകട സാധ്യതയും കണക്കിലെടുത്ത് രണ്ട് റോഡുകളിൽ വേഗപരിധി കുറച്ചിട്ടുണ്ട്.
വേഗപരിധി കൂട്ടിയ റോഡുകൾ:
* അൽ അസായൽ സ്ട്രീറ്റ്: ഔദ് മേത്ത സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിലുള്ള ഭാഗത്ത് വേഗപരിധി മണിക്കൂറിൽ 60 കിലോമീറ്ററിൽ നിന്ന് 80 കിലോമീറ്ററായി ഉയർത്തി.
* അൽ മുസ്തഖ്ബൽ സ്ട്രീറ്റ്: ഷെയ്ഖ് റാഷിദ് സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിൽ മണിക്കൂറിൽ 60-ൽ നിന്ന് 70 കിലോമീറ്ററാക്കി.
* ലത്തീഫ ബിൻത് ഹംദാൻ സ്ട്രീറ്റ്: ഷെയ്ഖ് സായിദ് റോഡിനും അൽ ഖൈൽ റോഡിനും ഇടയിലുള്ള മേഖലയിൽ പരിധി 60-ൽ നിന്ന് 70 കിലോമീറ്ററായി വർധിപ്പിച്ചു.
വേഗപരിധി കുറച്ച റോഡുകൾ:
* അൽ രിബാത്ത് സ്ട്രീറ്റ്: മറാക്കേഷ് സ്ട്രീറ്റിനും ഷെയ്ഖ് മുഹമ്മദ് ബിൻ സായിദ് റോഡിനും ഇടയിൽ മണിക്കൂറിൽ 100 കിലോമീറ്ററായിരുന്ന വേഗപരിധി 90 കിലോമീറ്ററായി കുറച്ചു.
* സെക്കൻഡ് ഡിസംബർ സ്ട്രീറ്റ് – ഖാലിദ് ബിൻ അൽ വലീദ് സ്ട്രീറ്റ്: ഈ മേഖലകൾക്കിടയിലെ പരിധി 80-ൽ നിന്ന് 70 കിലോമീറ്ററാക്കി ചുരുക്കി.
വാഹനപ്പെരുപ്പം, കാൽനടയാത്രക്കാരുടെ സാന്നിധ്യം, സമീപത്തെ വികസന പ്രവർത്തനങ്ങൾ എന്നിവ കണക്കിലെടുത്താണ് മാറ്റങ്ങൾ. നവംബർ ഒന്നിന് പരിഷ്കാരം നടപ്പിലാകുന്നതിന് മുന്നോടിയായി ഈ റോഡുകളിലെ വേഗപരിധി സൂചിപ്പിക്കുന്ന ബോർഡുകൾ മാറ്റുന്ന ജോലികൾ ആർ.ടി.എ. ആരംഭിച്ചിട്ടുണ്ട്.
