വീട്ടില്നിന്ന് വിളിച്ചിറക്കി മര്ദ്ദനം; യുവാവിനെ ആക്രമിച്ച കേസില് നാലുപേര് അറസ്റ്റില്
മലപ്പുറം: മുന്വിരോധത്തെ തുടര്ന്ന് യുവാവിനെ വീട്ടില്നിന്ന് വിളിച്ചിറക്കി സംഘം ചേര്ന്ന് ക്രൂരമായി മര്ദിച്ച സംഭവത്തില് നാലുപേര് അറസ്റ്റില്. മൂക്കുതല കാവില്പാടം കുളത്തിന് സമീപം ഈ മാസം 22നാണ് കേസിനാസ്പദമായ ആക്രമണം നടന്നത്. മൂക്കുതല സ്വദേശി വെന്നില വളപ്പില് അഫ്സലിനാണ് മര്ദനത്തില് ഗുരുതരമായി പരിക്കേറ്റത്. സംഭവവുമായി ബന്ധപ്പെട്ട് മൂക്കുതല സ്വദേശികളായ ജിതിന് (25), നിഹാല് (18), മുഹമ്മദ് ഹാദിഫ് (19), രാഹുല് (25) എന്നിവരെയാണ് ചങ്ങരംകുളം പൊലീസ് അറസ്റ്റ് ചെയ്തത്. അഫ്സലിനെ മുന്വിരോധം തീര്ക്കുന്നതിനായി വീട്ടില്നിന്ന് വിളിച്ചുവരുത്തിയ ശേഷം അഞ്ചുപേരടങ്ങുന്ന സംഘം കാവില്പാടം കുളത്തിന് സമീപത്തുവച്ച് മര്ദിച്ചെന്നാണ് പൊലീസിന് ലഭിച്ച പരാതി.ആക്രമണത്തില് പരിക്കേറ്റ അഫ്സല് നല്കിയ പരാതിയുടെ അടിസ്ഥാനത്തിലാണ് പൊലീസ് അന്വേഷണം ആരംഭിച്ചത്. സംഭവത്തില് കൂടുതല് പേര്ക്ക് പങ്കുണ്ടോയെന്നും ആക്രമണത്തിന് പിന്നിലെ കാരണങ്ങളെക്കുറിച്ചും പൊലീസ് അന്വേഷണം തുടരുകയാണ്. കേസില് ഉള്പ്പെട്ട ഒരാള് കൂടി പിടിയിലാകാനുണ്ടെന്ന് ചങ്ങരംകുളം എസ്.ഐ ജിതിന് വാസ് അറിയിച്ചു.പരാതിയുടെ അടിസ്ഥാനത്തില് വധശ്രമം ഉള്പ്പെടെയുള്ള വകുപ്പുകള് ചുമത്തിയാണ് പൊലീസ് കേസെടുത്തത്. അറസ്റ്റിലായ പ്രതികളെ പൊന്നാനി കോടതിയില് ഹാജരാക്കി റിമാന്ഡ് ചെയ്തു. കേസിലെ മറ്റ് പ്രതിയെ കണ്ടെത്തുന്നതിനായി അന്വേഷണം ഊര്ജിതമാക്കിയതായി പൊലീസ് അറിയിച്ചു.
