എറണാകുളം ചെല്ലാനത്ത് ചുഴലിക്കാറ്റിൽ അഞ്ചു വീടുകൾ തകർന്നു. ചെല്ലാനം കണ്ടക്കടവ് പ്രദേശത്ത് ഇന്ന് പുലർച്ചെ രണ്ടു മണിയോടെയാണ് സംഭവമുണ്ടായത്. കണ്ടക്കടവ് കാർത്ത്യായനി ക്ഷേത്രത്തിന് സമീപത്താണ് ചുഴലിക്കാറ്റ് ആഞ്ഞു വീശിയത്. ഷിബു പൊള്ളയിൽ, ടോണി പുളിയമ്പള്ളി, മെയ്ബി ക്ലാരൻസ് , ബിനു കല്ലുവീട്ടിൽ, ജോബൻ കൈതവളപ്പിൽ എന്നിവരുടെ വീടുകളാണ് തകർന്നത്.
വീടുകളുടെ മേൽക്കൂരകൾ പൂർണമായി തകർന്നു. നിരവധി വീടുകൾക്ക് ഭാഗികമായി നാശനഷ്ടവും ഉണ്ടായി. വീട് തകർന്നവരെ പുലർച്ചെ തന്നെ സുരക്ഷിത സ്ഥലത്തേക്ക് മാറ്റി താമസിപ്പിച്ചിട്ടുണ്ട്. അപകടത്തിൽ ആർക്കും പരിക്കേറ്റില്ല എന്നതും ആശ്വാസമായി.
