കണ്ണൂർ: കേരള ഖാദി ഗ്രാമ വ്യവസായ ബോര്ഡിന്റെ ആഭിമുഖ്യത്തില് സംസ്ഥാനതല വിഷു -റംസാന് ഖാദി മേള നാളെ കണ്ണൂര് ഖാദി ഗ്രാമ സൗഭാഗ്യയില് നടക്കും. ഉച്ചക്ക് 2.30ന് മന്ത്രി പി. രാജീവ് ഉദ്ഘാടനം ചെയ്യും. സംരംഭകത്വ പ്രോത്സാഹന പരിപാടിയുടെ ഭാഗമായി ഖാദി ബോര്ഡിന്റെ ധന സഹായത്തോടുകൂടി കൈരളി സ്വയം സഹായ സംഘം നാല് ഉത്പന്നങ്ങള് പുറത്തിറക്കും. കാര്ഷികോല്പന്നങ്ങളുടെ മൂല്യവര്ധിത ഉല്പന്നങ്ങളായ കൂവപ്പൊടി, ബേബി ഫുഡ്, ഹെയര് ഓയില്, ബോഡി മസാജ് ഓയില് എന്നിവയാണ് മന്ത്രി വിപണിയിലിറക്കുന്നത്. പയ്യന്നൂര് ഖാദി കേന്ദ്രത്തിന്റെ പുതിയ ഡിസൈനിലുള്ള വസ്ത്രങ്ങളുടെ ഉദ്ഘാടനം ഖാദി ബോര്ഡ് വൈസ് ചെയര്മാന് പി. ജയരാജനും ആദ്യ വില്പന കളക്ടര് എസ്. ചന്ദ്രശേഖറും നിര്വഹിക്കും. മേളയില് ഖാദിക്ക് 30ശതമാനം വരെ ഗവ. റിബേറ്റ് ലഭിക്കും.