കേരളത്തിലെ വികസനക്കുതിപ്പിന് കൂടുതൽ ആവേശം പകരുമെന്ന് അവകാശപ്പെടുന്ന കെ റെയിൽ പദ്ധതിയെപ്പറ്റിയുള്ള ജനത്തിന്റെ ആശങ്ക പരിഹരിക്കാൻ സർക്കാർ തയാറാകണമെന്ന് കെസിവൈഎം തലശേരി അതിരൂപത സമിതി.
ജനാധിപത്യ രീതിയിൽ പ്രതിഷേധം നടത്തുന്നവരെ കയ്യേറ്റം ചെയ്യുന്ന നടപടി അംഗീകരിക്കാനാകില്ല. മനുഷ്യാവകാശ കമ്മീഷൻ നേരിട്ട് കേസെടുത്ത് അന്വേഷിക്കണമെന്ന് സമിതി ആവശ്യപ്പെട്ടു.
സന്തുലിത വികസനത്തിലൂന്നിയ വികസന നയമാണ് ഭരണകർത്താക്കൾ ആവിഷ്കരിക്കേണ്ടതെന്നും കെ-റെയിൽ പോലുള്ള വൻകിട പദ്ധതികൾ ആവിഷ്കരിക്കുമ്പോൾ അതിന്റെ സാധ്യതകൾ ചർച്ച ചെയ്തു പൊതുസമൂഹത്തെ ബോധവത്കരിക്കാൻ സർക്കാരിന് ഉത്തരവാദിത്വമുണ്ടെന്നും കെസിവൈഎം അഭിപ്രായപ്പെട്ടു.
കേന്ദ്രമന്ത്രാലയം പരിസ്ഥിതി പ്രവർത്തകർ, വിദഗ്ധ ഉപദേശകർ കെ -റെയിൽ പദ്ധതിയെ എതിർക്കുമ്പോൾ അവയ്ക്ക് വ്യക്തമായ മറുപടി നൽകാതെ പദ്ധതിക്കുവേണ്ടി കല്ലിടീൽ പോലുള്ള നടപടിക്രമങ്ങൾ സർക്കാർ നിർത്തിവയ്ക്കണം. അതിരൂപത പ്രസിഡന്റ് ജോയേൽ തൊട്ടിയിലിന്റെ അധ്യക്ഷതയിൽ ചേർന്ന യോഗത്തിൽ ഡയറക്ടർ ഫാ.തോമസ് വാളിപ്ലാക്കൽ , ജനറൽ സെക്രട്ടറി അഖിൽ സി.ജെ, സംസ്ഥാന സെക്രട്ടറി ഷിജോ നിലക്കപ്പള്ളി തുടങ്ങിയവർ പങ്കെടുത്തു.