കൊച്ചി ∙ ഇന്ധന വിലവർധനയ്ക്കു പിന്നാലെ ജനങ്ങൾക്ക് ഇരുട്ടടിയായി രാജ്യത്തു പാചകവാതക വിലയും കൂട്ടി. ഗാര്ഹിക സിലിണ്ടറിന് 50 രൂപയാണു കൂട്ടിയത്. കൊച്ചിയിലെ വില 956 രൂപയായി. അതേസമയം, വാണിജ്യ സിലിണ്ടറിന് എട്ടുരൂപ കുറച്ചിട്ടുണ്ട്. നാലു മാസത്തിനു ശേഷം ഇന്ത്യയിൽ പെട്രോൾ–ഡീസൽ വില കൂട്ടിയിരുന്നു. അഞ്ചു സംസ്ഥാനങ്ങളിലെ തിരഞ്ഞെടുപ്പിനു പിന്നാലെയാണു വില കൂട്ടിയത്.
പെട്രോൾ ലീറ്ററിന് കൂട്ടിയത് 87 പൈസ. ഡീസൽ ലീറ്ററിന് 85 പൈസയും കൂട്ടി. 2021 നവംബറിലായിരുന്നു രാജ്യത്ത് അവസാനമായി ഇന്ധന വിലയിൽ വർധന വരുത്തിയത്. നിലവിൽ, കൊച്ചിയിൽ പെട്രോൾ വില 104.31 ആയിരുന്നത് 87 പൈസ വർധിച്ച് 105.18ലെത്തി. ഡീസലിന് 91.55 രൂപയായിരുന്നത് 85 പൈസ വർധിച്ച് 92.40 രൂപയായി.