പൊലീസുകാരിയുടെ സ്ഥലംമാറ്റത്തിന് കാരണം വൈരാഗ്യമെന്ന് പരാതി; ആരോപണവുമായി കോട്ടയത്തെ എഎസ്ഐ സ്വപ്ന കരുണാകരൻ
കോട്ടയം: പൊലീസുകാരിയെ അകാരണമായി സ്ഥലം മാറ്റിയെന്ന് പരാതി. കോട്ടയം മണർകാട് സ്റ്റേഷനിലെ എഎസ്ഐ സ്വപ്ന കരുണാകരനെ സ്ഥലംമാറ്റിയതുമായി ബന്ധപ്പെട്ടാണ് പരാതി ഉയർന്നത്. പൊലീസ് അസോസിയേഷൻ തെരഞ്ഞെടുപ്പിൽ മത്സരിച്ചതിലെ വൈരാഗ്യമാണ് തൻ്റെ സ്ഥലംമാറ്റത്തിന് പിന്നിലെന്ന് സ്വപ്ന കരുണാകരൻ ആരോപിക്കുന്നു. പൊലീസ് ഓഫീസേഴ്സ് അസോസിയേഷൻ പരിപാടിക്കെതിരെ ഫെയ്സ്ബുക്കിൽ കമന്റ് ചെയ്തതും സ്ഥലംമാറ്റത്തിന് കാരണമായെന്ന് അവർ കുറ്റപ്പെടുത്തുന്നു.
തിരുവനന്തപുരത്ത് നടക്കുന്ന ‘നമുക്ക് പറയാം’ പരിപാടിക്കെതിരെ സ്വപ്ന ഫേസ്ബുക്കിൽ കമന്റ് ചെയ്തിരുന്നു. ഇതിന് പിന്നാലെയാണ് കോട്ടയം മണർകാട് സ്റ്റേഷനിൽ നിന്ന് എറണാകുളം റൂറലിലേക്ക് സ്വപ്നയെ സ്ഥലംമാറ്റിയത്. സമൂഹ മാധ്യമങ്ങളിൽ സേനയെ അവഹേളിച്ചതിനാണ് നടപടിയെന്നാണ് പൊലീസിൻ്റെ വിശദീകരണം. സമൂഹ മാധ്യമങ്ങളിൽ ഇടപെടുമ്പോൾ സേനാംഗങ്ങൾ പാലിക്കേണ്ട നിർദേശങ്ങൾ ലംഘിച്ചെന്നും ഡിഐജി കുറ്റപ്പെടുത്തുന്നു.
