സാങ്കേതിക വിദ്യാഭ്യാസ മേഖലയില് ഇന്റേണ്ഷിപ് അവസരങ്ങളുടെ ഒരു പുതു ലോകം തുറന്നുകൊണ്ട് അഡീഷണല് സ്കില് അക്വിസിഷന് പ്രോഗ്രാം (ASAP) കേരള, എ.പി.ജെ. അബ്ദുള് കലാം സാങ്കേതിക സര്വകലാശാലയുമായി (KTU) കൈകോര്ക്കുന്നു. അക്കാദമിക് ലോകവും അതിവേഗം മാറിക്കൊണ്ടിരിക്കുന്ന വ്യവസായ മേഖലയും തമ്മിലുള്ള അന്തരം ഇല്ലാതാക്കുക എന്ന ലക്ഷ്യത്തോടെയാണ് ഈ സംയുക്ത ഇന്റേണ്ഷിപ്പ് പദ്ധതിക്ക് രൂപം നല്കിയിരിക്കുന്നത്. വിവിധ സാങ്കേതിക മേഖലകളിലെ വിദ്യാര്ത്ഥികള്ക്ക് ഇനി പഠനത്തിനപ്പുറം യഥാര്ത്ഥ പ്രൊജക്റ്റുകളിലും പ്രൊഫഷണല് തൊഴില് അന്തരീക്ഷത്തിലും നേരിട്ടുള്ള പ്രായോഗിക പരിശീലനം നേടാന് ഈ പദ്ധതി അവസരം ഒരുക്കുന്നു.
രാജ്യത്തെ പ്രമുഖ പൊതു-സ്വകാര്യ സ്ഥാപനങ്ങള്, നൂതന സ്റ്റാര്ട്ടപ്പുകള്, കോര് ടെക്നോളജി വ്യവസായങ്ങള് എന്നിവയുമായി സഹകരിച്ചാണ് ഈ ഇന്റേണ്ഷിപ്പുകള് സംഘടിപ്പിക്കുന്നത്. നാല് മുതല് ആറ് മാസം വരെ ദൈര്ഘ്യമുള്ള ഇന്റേണ്ഷിപ്പുകളാണ് അക്കാദമിക് പാഠ്യപദ്ധതിയുടെ ഭാഗമായി അന്തിമ വര്ഷ വിദ്യാര്ത്ഥികള്ക്ക് ലഭിക്കുന്നത്. ഈ പ്രായോഗിക പരിശീലനം വിദ്യാര്ത്ഥികളുടെ സാങ്കേതിക വൈദഗ്ദ്ധ്യം വര്ദ്ധിപ്പിക്കാനും, ഉയര്ന്ന തൊഴില് സാധ്യത ഉറപ്പിക്കാനും, വ്യവസായ ലോകത്തെ കൂടുതല് മനസ്സിലാക്കാനും സഹായിക്കുന്നു. ഭാവിയിലെ തൊഴില് വിപണിക്ക് അനുയോജ്യമായ രീതിയില് വിദ്യാര്ത്ഥികളെ രൂപപ്പെടുത്താന് ഈ പദ്ധതി പ്രതിജ്ഞാബദ്ധമാണ്.
ഈ ഇന്റേണ്ഷിപ്പ് അവസരങ്ങള്ക്കായി വിദ്യാര്ത്ഥികള്ക്ക് രജിസ്ട്രേഷന് സമയത്ത് ഒരു നിശ്ചിത ഫീസ് അടച്ച് അപേക്ഷിക്കാവുന്നതാണ്. ASAP കേരളയുടെ കരിയര്ലിങ്ക് പോര്ട്ടല് വഴി വിദ്യാര്ത്ഥികള്ക്കും സ്ഥാപനങ്ങള്ക്കും ഈ പദ്ധതിയില് രജിസ്റ്റര് ചെയ്യാം. കേരളത്തിലെ യുവ എഞ്ചിനീയര്മാര്ക്ക് അവരുടെ കരിയര് സ്വപ്നങ്ങള് യാഥാര്ത്ഥ്യമാക്കാനുള്ള മികച്ച വേദിയാണ് ഈ സംയുക്ത സംരംഭം തുറന്നു നല്കുന്നത്.
