പ്രധാനമന്ത്രി ഗ്രാമീണ സഡക്ക് യോജന പദ്ധതിയുടെ ഭാഗമായി കെ. സുധാകരൻ എം.പി സമർപ്പിച്ച പ്രൊപ്പോസലിൽ നിന്ന് നാല് റോഡുകൾക്കായി 12.47 കോടി രൂപ അനുവദിച്ചു. ഇരിട്ടി ബ്ലോക്കിലെ വാഴക്കൽ ഊർപ്പള്ളി തെക്കും പൊയിൽ റോഡിന് രണ്ട് കോടി 66 ലക്ഷം രൂപയും, വീർപ്പാട് വെളിമാനം മനുവയൽ കരടിമല റോഡിന് രണ്ട് കോടി 50 ലക്ഷം രൂപയും, കൂത്തുപറമ്പ് ബ്ലോക്കിലെ മുന്നാം പീടിക കണ്ടേരി മാണിക്കോത്ത് വയൽ റോഡിന് രണ്ട് കോടി 26 ലക്ഷം രൂപയും, ഇരിക്കൂർ ബ്ലോക്കിലെ പാവന്നൂർ വെള്ളിവയൽ തവളപ്പാറ തുരുത്തി റോഡിന് അഞ്ച് കോടി അഞ്ച് ലക്ഷം രൂപയുമാണ് അനുവദിച്ചത്. കണ്ണൂർ ലോകസഭാ മണ്ഡലത്തിലെ 70 റോഡുകളുടെ പ്രൊപ്പോസലാണ് കെ. സുധാകരൻ എംപി പ്രധാനമന്ത്രി ഗ്രാമീണ സഡക്ക് യോജന പദ്ധതിയുടെ ഭാഗമായി സമർപ്പിച്ചിരുന്നത്. വിവിധ ഘട്ടങ്ങളായുള്ള പരിശോധനകൾ പൂർത്തിയാകുന്നതോടെ നിർദേശിക്കപ്പെട്ട ഭൂരിഭാഗം റോഡുകൾക്കും പ്രധാനമന്ത്രി ഗ്രാമീണ സഡക്ക് യോജന പദ്ധതിയിൽ ഫണ്ട് അനുവദിക്കപ്പെടുമെന്ന് കെ. സുധാകരൻ എംപി പറഞ്ഞു.
കെ. സുധാകരൻ നിർദേശിച്ച റോഡുകൾക്ക് 12.47 കോടി
