സംസ്ഥാനത്തെ റോഡപകടങ്ങളില്‍ മരിക്കുന്നവരില്‍ കാല്‍നടക്കാര്‍ 20 ശതമാനത്തിലേറെ. കാല്‍നടക്കാരുടെ സുരക്ഷയ്ക്ക് റോഡ്സുരക്ഷാ ഫണ്ട് ഉപയോഗിച്ച്‌ നടപ്പാക്കാന്‍ തുടങ്ങിയ പരിപാടികള്‍ പൂര്‍ണമായിട്ടില്ല. വഴിനടന്നുപോകുന്നവരില്‍ ഇത്രയേറെപ്പേര്‍ ഇരയാകുന്നത് ആശങ്കജനകം.
കാല്‍നടക്കാരില്‍ മൂന്നിലൊന്ന് പേരും മരിച്ചത് രാത്രിയിലാണെന്ന് ഗതാഗതവകുപ്പിന്റെ കണക്കുകള്‍ പറയുന്നു. 2018-ല്‍ അപകടങ്ങളില്‍ മരിച്ചവരുടെ 29 ശതമാനം പേരും കാല്‍നടക്കാരായിരുന്നു. 2019-ല്‍ ഇത് 28.3 ശതമാനമായി. 2020-ലും 21 ജൂണ്‍വരെയുള്ള കണക്കുകള്‍പ്രകാരം കാല്‍നടക്കാരുടെ മരണനിരക്ക് 24.8 ശതമാനമായി. 2021 ജൂണ്‍ വരെയുള്ള കണക്കുപ്രകാരം ഇത് 22.9 ശതമാനമാണ്. ലോക്‌ഡൗണ്‍ മൂലം ജനം പുറത്തിറങ്ങുന്നത് കുറഞ്ഞതാകാം അപകടവും മരണവും കുറച്ചത്.