ഇരിട്ടി: കോവിഡ് വ്യാപനം രൂക്ഷമായതോടെ ആറളം പഞ്ചായത്തിലെ രണ്ട് വാർഡുകൾ അടച്ചു. വിയറ്റ്നാം, ആറളം ഫാം ബ്ലോക്ക് പതിമ്മൂന്നിലെ അൻപത്തഞ്ച് പ്രദേശങ്ങൾ എന്നിവയാണ് അടച്ചത്. രോഗവ്യാപനത്തെ തുടർന്ന് പഞ്ചായത്ത് സുരക്ഷാസമിതി യോഗത്തിന്റെ തീരുമാനപ്രകാരമാണ് അടച്ചത്.
ആറളം ഫാം 13-ാം ബ്ലോക്കിലെ 55 പ്രദേശത്ത് തിങ്കളാഴ്ച 53 പേർക്ക് ടെസ്റ്റ് നടത്തിയപ്പോൾ 39 പേർക്ക് പോസിറ്റീവായിരുന്നു. വിയ്റ്റ്നാമിൽ രോഗവ്യാപനം രൂക്ഷമായി തുടരുകയാണ്. രണ്ടുപേർ കോവിഡ് ബാധിച്ച് മരിച്ചു. ഈ സാഹചര്യത്തിലാണ് രണ്ട് പ്രദേശവും പൂർണമായും അടയ്ക്കാൻ തീരുമാനിച്ചത്. ഇവിടെങ്ങളിൽ ആർ.ആർ.ടി. അംഗങ്ങളുടെ സേവനം ലഭ്യമാക്കി ഹോം ഡെലിവറി നടത്താനാണ് തീരുമാനം. ജനങ്ങൾ ജാഗ്രത പാലിക്കണമെന്ന് പ്രസിഡന്റ് കെ.പി. രാജേഷ് അറിയിച്ചു.