സംസ്ഥാനത്ത് അടുത്ത അഞ്ച് ദിവസം ഒറ്റപ്പെട്ട ഇടങ്ങളിൽ ശക്തമായ മഴയും ഇടിമിന്നലും കാറ്റും ഉണ്ടാകുമെന്ന് കാലാവസ്ഥാ നിരീക്ഷണ കേന്ദ്രത്തിന്‍റെ മുന്നറിയിപ്പ്. 30 മുതൽ 40 കിലോമീറ്റർ വരെ വേഗത്തിൽ കാറ്റുവീശാൻ സാധ്യതയെന്നാണ് റിപ്പോർട്ട്. ശക്തമായ ഇടിമിന്നലിനും സാധ്യതയുള്ളതിനാൽ തുറസായ സ്ഥലങ്ങളിൽ നിൽക്കുന്നത് ഒഴിവാക്കണമെന്നും മുന്നറിയിപ്പുണ്ട്.
ഏപ്രിൽ 14ന് ശേഷം മലയോര ജില്ലകളിലും മഴയ്ക്ക് സാധ്യതയുണ്ട്. വേനൽ മഴ കേരളത്തിലാകെ ലഭിക്കുമെന്നാണ് കാലാവസ്ഥാ പ്രവചനം.ശനിയാഴ്ച വൈകിട്ടും ഞായറാഴ്ച പുലർച്ചെയുമായി സംസ്ഥാനത്തിന്‍റെ വിവിധയിടങ്ങളിൽ ശക്തമായ മഴ പെയ്തിരുന്നു. മധ്യകേരളത്തിലെ മലയോര മേഖലകളിലാണ് ശക്തമായ മഴ ലഭിച്ചത്. പലയിടത്തും ശക്തമായ ഇടിമിന്നലുമുണ്ടായിരുന്നു.