കൊച്ചി കലൂരിൽ യുവതിയെ പിന്തുടർന്ന് ആക്രമിക്കുകയും വസ്ത്രങ്ങൾ വലിച്ചുകീറി ഉപദ്രവിക്കാൻ ശ്രമിക്കുകയും ചെയ്ത കേസിൽ യുവാവ് അറസ്റ്റിൽ. ഇടുക്കി എലപ്പാറ കൊച്ചുകരിംതരുവി ഇല്ലിക്കൽ വീട്ടിൽ അനന്തുവിനെയാണ് (21) എറണാകുളം ടൗൺ നോർത്ത് പൊലിസ് പിടികൂടിയത്.
പ്രതിയും പരാതിക്കാരിയായ യുവതിയും മുൻപ് പരിചയക്കാരായിരുന്നെങ്കിലും, ഇയാളുടെ മോശം സ്വഭാവം തിരിച്ചറിഞ്ഞ യുവതി പിന്നീട് ബന്ധം പൂർണമായി ഉപേക്ഷിക്കുകയായിരുന്നു. ഇതിലുള്ള കടുത്ത വിരോധമാണ് ക്രൂരമായ ഈ ആക്രമണത്തിലേക്ക് നയിച്ചതെന്ന് പൊലിസ് വ്യക്തമാക്കി.
ഒക്ടോബർ 14-ന് വൈകുന്നേരം ആറിന് കലൂർ ആസാദ് റോഡിലൂടെ നടന്നുപോകുകയായിരുന്ന യുവതിയെ പ്രതി ലക്ഷ്യമിട്ട് പിന്തുടരുകയായിരുന്നു. ആളൊഴിഞ്ഞ ഭാഗത്തുവെച്ച് യുവതിയെ തടഞ്ഞുനിർത്തി കടന്നുപിടിക്കുകയും, യുവതി ചെറുത്തുനിന്നപ്പോൾ മുഖത്തടിച്ച് വസ്ത്രങ്ങൾ വലിച്ചുകീറി ഉപദ്രവിക്കുകയുമായിരുന്നു. എന്നാൽ യുവതിയുടെ നിലവിളി കേട്ട് പ്രദേശവാസികൾ ഓടിക്കൂടിയതോടെ പരിഭ്രാന്തനായ പ്രതി സംഭവസ്ഥലത്തുനിന്ന് ഓടിരക്ഷപ്പെടുകയായിരുന്നു.
യുവതിയുടെ പരാതിയെത്തുടർന്ന് എറണാകുളം ടൗൺ നോർത്ത് പൊലിസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. കലൂരിലെ ഒരു ഹോസ്റ്റലിൽ ഒളിവിൽ കഴിയുകയായിരുന്ന അനന്തുവിനെ എറണാകുളം സെൻട്രൽ അസിസ്റ്റന്‍റ് പൊലിസ് കമ്മീഷണർ സിബി ടോമിന്‍റെ നേതൃത്വത്തിലുള്ള അന്വേഷണ സംഘം സൈബർ സെല്ലിന്‍റെ സഹായത്തോടെ നടത്തിയ നീക്കത്തിലാണ് കുടുക്കാനായത്.
