ശബരിമല സ്വര്ണക്കൊള്ളയിലെ കട്ടിളപ്പാളി കേസ്: സമയപരിധി കഴിഞ്ഞിട്ടും എസ്ഐടിയുടെ അന്തിമ റിപ്പോര്ട്ട് ആയില്ല
കൊച്ചി: ശബരിമല സ്വര്ണക്കൊള്ളയിലെ കട്ടിളപ്പാളി കേസില് അന്തിമറിപ്പോര്ട്ട് നല്കാനുള്ള സമയപരിധി ഇന്നവസാനിക്കാനിരിക്കെ എസ്ഐടിയുടെ അന്തിമറിപ്പോര്ട്ട് തയാറായില്ല. ഒരു ഫോറെന്സിക് പരിശോധനാഫലം കൂടി ലഭിക്കാനുണ്ടെന്നാണ് വിവരം. അടുത്ത മാസം ഏഴിന് കേസ് ഹൈക്കോടതി പരിഗണിക്കും.
കഴിഞ്ഞ വര്ഷം ഒക്ടോബറിലാണ് ശബരിമല സ്വര്ണക്കൊള്ളയില് എസ്ഐടി അന്വേഷണം ആരംഭിച്ചത്. 11 മാസം പിന്നിട്ടു. കഴിഞ്ഞ തവണത്തെ ഹൈകോടതി ഇടക്കാല ഉത്തരവില് സെപ്റ്റംബര് 25ന് മുന്പ് സമര്പ്പിക്കുമെന്ന് എസ്ഐടി അറിയിച്ചെങ്കിലും സാധിച്ചില്ല.
കട്ടിളപാളി കേസില് ഒരു ഫോറെന്സിക് റിപ്പോര്ട്ട് കൂടി ലഭിക്കാനുണ്ട്. അതിനാലാണ് അന്തിമ കുറ്റപത്രം നീളുന്നത്. മണ്ഡലകാലം തുടങ്ങുന്നതിനു മുന്പ് കുറ്റപത്രം സമര്പ്പിക്കാം എന്ന് പ്രതീക്ഷയിലാണ് എസ്ഐടി.
ശബരിമല സ്വര്ണക്കൊള്ളയില് കോടതി നിര്ദേശിച്ച സമയത്ത് കുറ്റപത്രം സമര്പ്പിച്ചില്ലെങ്കില് കയ്യുംകെട്ടി നോക്കിനില്ക്കില്ലെന്ന് ദേവസ്വം മന്ത്രി കെ മുരളീധരന് പ്രതികരിച്ചിരുന്നു. എജിയോട് ഇക്കാര്യം സംസാരിച്ചിട്ടുണ്ടെന്നും മറുപടി ഉണ്ടാകുമെന്നും മന്ത്രി വ്യക്തമാക്കുകയും ചെയ്തു. മുന് ദേവസ്വം അധികൃതരടക്കം 15 പേര് പ്രതികളായ ഈ കേസില് 13 പേര്ക്കെതിരേയും കുറ്റപത്രം നല്കാന് പ്രോസിക്യൂഷന് അനുമതി ആവശ്യമാണ്. എന്നാല്, എസ്ഐടി പ്രോസിക്യൂഷന് അനുമതി പോലും തേടാതിരുന്നത് വിമര്ശനങ്ങള്ക്കിടയാക്കിയിരുന്നു.
