കണ്ണൂര് വിമാനത്താവളത്തിന്റെ വികസനത്തിനായി അടിയന്തരമായി യൂണിയന് ഗവണ്മെന്റ് നടപടികള് കൈക്കൊള്ളണമെന്ന് വി ശിവദാസന് എംപി രാജ്യസഭയില് പ്രത്യേക പരാമര്ശത്തിലൂടെ ആവശ്യപ്പെട്ടു. കൂടുതല് അന്താരാഷ്ട്ര വിമാനങ്ങള് അനുവദിച്ച് കണ്ണൂര് വിമാനത്താവളത്തിന്റെ വികസനത്തിനു ഊര്ജം പകരണം. അന്താരാഷ്ട്ര നിലവാരം പുലര്ത്തുന്ന മികച്ച അടിസ്ഥാന സൗകര്യമുള്ള കണ്ണൂര് വിമാനത്താവളത്തിന് വലിയ വികസന സാധ്യതകളുണ്ട്. അതിനാല് എത്രയും വേഗം പ്രധാനപ്പെട്ട എല്ലാ അന്താരാഷ്ട്ര ലക്ഷ്യസ്ഥാനങ്ങളിലേക്കും വിമാനങ്ങള് അനുവദിക്കേണ്ടതാണ്.
കണ്ണൂര് എയര്പോര്ട്ടിനെ പോയിന്റ് ഓഫ് കോള് ലിസ്റ്റില് ഉള്പ്പെടുത്തണം. വിമാനത്താവളത്തില് നിന്ന് ഹജ്ജ് എംബാര്ക്കേഷനും അനുവദിക്കണം. കണ്ണൂര് വിമാനത്താവളത്തിന്റെ മുഴുവന് സാധ്യതകളും പ്രയോജനപ്പെടുത്താനും മേഖലയിലെ സമ്പദ്വ്യവസ്ഥ, വ്യവസായം, ടൂറിസം, മൊബിലിറ്റി എന്നിവയുടെ വികസനത്തിന് സംഭാവന നല്കാനും കേന്ദ്രസര്ക്കാര് ഈ വിഷയത്തില് സത്വര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.