മാർച്ച് 3-ന് ഇന്ത്യയിൽ അപൂർവ്വമായ ബ്ലഡ് മൂൺ പ്രതിഭാസം ദൃശ്യമാകും. പൂർണ ചന്ദ്രഗ്രഹണ സമയത്ത് ചന്ദ്രൻ രക്തച്ചുവപ്പ് നിറത്തിൽ തെളിയുന്നത് ഈ പ്രതിഭാസത്തിന്റെ പ്രത്യേകതയാണ്.
ഭൂമി സൂര്യനും ചന്ദ്രനും ഇടയിൽ കൃത്യമായി വരുമ്പോൾ, ഭൂമിയുടെ അന്തരീക്ഷത്തിലൂടെ കടന്ന് പോകുന്ന തരംഗ ദൈർഘ്യം കുറഞ്ഞ നീല പ്രകാശം ചിതറി പോകുകയും, തരംഗ ദൈർഘ്യം കൂടിയ ചുവന്ന പ്രകാശം ചന്ദ്രനിൽ പതിക്കുന്നതിലൂടെയുമാണ് ബ്ലഡ് മൂൺ ദൃശ്യമാകുന്നത്. കേരളത്തിൽ വൈകുന്നേരം 6.30 മുതൽ 7.53 വരെയും, ന്യൂഡൽഹിയിൽ വൈകുന്നേരം 5.21 മുതൽ 6.23 വരെയും ഗ്രഹണം കാണാൻ കഴിയുമെന്ന് ശാസ്ത്രജ്ഞർ അറിയിച്ചു. ചന്ദ്രോപരിതലത്തിലെ ഗർത്തങ്ങളും നിഴലുകളും കൂടുതൽ കാണാൻ ബൈനോക്കുലർ ഉപയോഗിക്കാം.
മാർച്ച് 3-ലെ ഗ്രഹണം 2026-ലെ ഏക പൂർണ ചന്ദ്രഗ്രഹണം കൂടിയാണ്. വടക്കേ അമേരിക്കയിൽ പൂർണ ഗ്രഹണം സൂര്യോദയത്തിന് മുമ്പ് കാണാം.
ഓസ്ട്രേലിയ, ന്യൂസിലാൻഡ്, കിഴക്കൻ ഏഷ്യ, പസഫിക് എന്നിവിടങ്ങളിൽ വൈകുന്നേരവും രാത്രിയും ഗ്രഹണം കാണാം. ഇന്ത്യയിലെ എല്ലാ പ്രദേശങ്ങളിലും പൂർണ ഗ്രഹണം കാണാനാകില്ലെങ്കിലും, ചന്ദ്രോദയ സമയത്ത് പുറത്ത് നോക്കിയാൽ ഭൂമിയുടെ നിഴൽ ചന്ദ്രനിൽ നിന്ന് മാറുന്ന മനോഹര കാഴ്ച കാണാൻ കഴിയും.
