രാത്രിയിൽ ഉച്ചത്തിൽ പാട്ട് വെച്ചു; തിരുവനന്തപുരത്ത് വീട് കയറി ആക്രമിച്ച് യുവാക്കൾ,ജനൽ ചില്ലുകൾ അടിച്ച് തകർത്തു

തിരുവനന്തപുരം: രാത്രിയിൽ ഉച്ചത്തിൽ പാട്ടുവെച്ചതിനെ ചൊല്ലി വീട്ടിൽ കയറി യുവാക്കളുടെ പരാക്രമം. തിരുവനന്തപുരം കള്ളിക്കാട് ആണ് സംഭവം. കള്ളിക്കാട് പെരുംകുളങ്ങര സ്വദേശിയും അഭിഭാഷകനുമായ ശ്രീജിത്തിന്റെ വീട്ടിലാണ് മൂന്ന് യുവാക്കളെത്തി ആക്രമണം അഴിച്ചുവിട്ടത്.

വീട്ടിൽ അതിക്രമിച്ചു കടന്ന യുവാക്കൾ ജനൽ ചില്ലുകൾ അടിച്ച് തകർത്തു. സംഭവത്തിൽ അയൽവാസികളായ ഹരീഷ് (35), ജയരാജ് (33), ഉണ്ണികൃഷ്ണൻ(29)എന്നിവരെ പൊലീസ് കസ്റ്റഡിയിലെടുത്തു. പ്രദേശത്ത് തങ്ങൾക്ക് ജീവിക്കാൻ കഴിയാത്ത സാഹചര്യമെന്ന് ശ്രീജിത്ത് പറഞ്ഞു.

ഇക്കഴിഞ്ഞ ശനിയാഴ്ച രാത്രി 11.45നായിരുന്നു സംഭവം. വീടിന്റെ ഗേറ്റ് തുറന്നെത്തിയ പ്രതികൾ ശ്രീജിത്തിനെയും ഭാര്യയെയും അസഭ്യം പറഞ്ഞു. ശ്രീജിത്തിനെ ഇവർ കഴുത്തിന് പിടിച്ച് ഭീഷണിപ്പെടുത്തിയെന്നും പരാതിയിൽ പറയുന്നു.